Миёни Кумитаи давлатии сармоягузорӣ ва идораи амовли давлатии Тоҷикистон ва корпоратсияи China Gold созишномаи намунавӣ дар бораи ҳамкорӣ ба имзо расид.
Санадро рӯзи шанбеи ҳафтаи гузашта раиси Кумита Қодири Қосим ва муовини директори корпоратсия Сун Лиэнжонг ба имзо расониданд.
Тавре аз хадамоти матбуоти Кумита иттилоъ доданд, дар маросими баимзорасии созишнома Қодири Қосим қайд кардааст, ки ба туфайли талош ва иродаи сиёсии сарони ҳарду кишвар, ҳамкориҳо миёни Тоҷикистону Чин дар бахшҳои гуногуни иқтисод таҳкиму густариш меёбанд. «Дар ҳамин ҳол, барои рушди минбаъдаи муносибатҳои дуҷониба имконоти иловагӣ мавҷуданд», – иброз доштааст ӯ.
Раиси Кумита таъкид доштааст, ки айни замон ҳаҷми сармоягузориҳои Чин ба соҳаҳои гуногуни иқтисоди Тоҷикистон, ки барои ҳарду ҷониб судманд аст, дар ҳоли афзоиш аст.
Ба иттилои манбаъ, корпоратсияи China Gold корхонаи бузурги Чин дар бахши истихроҷ ва коркарди тилло мебошад.
Зимнан зикр гардид, ки ин ширкат ба саноати кӯҳкории Тоҷикистон сармоягузорӣ карданист. «Дар марҳилаи аввали ҳамкорӣ China Gold барои сохтмони корхонаи муштараки Тоҷикистону Чин оид ба истеҳсоли маводи тарканда дар ҷануби кишвар мустақиман 30 млн. доллари ИМА маблағгузорӣ мекунад», – гуфтанд дар Кумита.
