Рӯзи сешанбеи ҳамин ҳафта нахуствазири Тоҷикистон Қоҳир Расулзода дар нишасти СММ оид ба тағйири иқлим дар Ню-Йорк назди 126 нафар сарони кишварҳои дунё суханронӣ намуд.
Сармушовири хадамоти матбуоти президенти ҶТ Субҳиддин Муҳиддинов ба «Азия-Плюс» тариқи телефон аз шаҳри Ню-Йорк дар ин робита иттилоъ дод, ки зимни суханронӣ Қоҳир Расулзода кишварҳои ҷаҳонро ба дастгирии ташаббуси Тоҷикистон бобати таъсиси Хазинаи байнулмилалии ҳифзи пиряхҳо даъват кард.
Нахуствазири Тоҷикистон таъкид дошт, ки ба ҷомеаи ҷаҳонӣ баргузор намудани мониторинги вазъи пиряхҳои ҷаҳон зарур аст. «Дар натиҷаи гармшавии иқлим, афзоиши ҳаҷми партоби газҳои гулхонаӣ ба фазо, аз соли 1995 то соли 1990 масоҳати пиряхҳо дар Тоҷикистон се маротиба хурд шуда, тибқи пешгӯиҳо, тайи даҳсолаи наздик боз ба андозаи 30 фоиз коҳиш меёбанд», – гуфтааст ӯ.
Қоҳир Расулзода ҳамчунин зикр кардааст, ки давоми шаст соли ахир ҳарорати миёнаи ҳаво дар Тоҷикистон як дараҷа боло рафта, дар ҳамин ҳол, рӯзҳои боронӣ ҳам зиёд шудаанд.
Ба гуфтаи нахуствазири ҶТ, аз рӯи сатҳи хориҷ кардани газҳои гулхонаӣ ба фазо миёни кишварҳои ҷаҳон Тоҷикистон мақоми 150-ум ва дар байни давлатҳои минтақаи Осиёи Марказӣ зинаи охирро ишғол мекунад.
Зимни суханронӣ Расулзода таваҷҷуҳи ҳозиринро ба мушкилоти бахши гидроэнергетикаи Тоҷикистон ҷалб намудааст. «Сарфи назар аз захираҳои бойи гидроэнергетикӣ бархӯрдор будани кишвар, дар мавсими тирамоҳу зимистон қисмате аз аҳолии Тоҷикистон ҳамагӣ 6-7 соат бо нерӯи барқ таъмин карда мешаванд», – қайд кардааст ӯ.
Нахуствазири Тоҷикистон ҳамзамон таъкид доштааст, ки дар маҷмӯъ захираҳои гидроэнергетикии Тоҷикистон 527 млрд. кВт/соатро ташкил медиҳанд, ки аз талаботи минтақа се маротиба зиёдтар аст. «Беш аз 70%-и нерӯи барқ дар минтақа дар Марказҳои барқу гармидиҳӣ истеҳсол мешавад, ки дар навбати худ, ба вазъи иқлим таъсири манфӣ мегузоранд», – зикр кардааст Расулзода.
