Дар муқоиса бо ҳамин давраи соли гузашта дар зарфи 10 моҳи соли равон ҳаҷми муомилоти моли Тоҷикистон бо кишварҳои Аврупо қариб 60%зиёд шуд.
Бино ба маълумоти Агентии омори назди президенти ҶТ, давоми моҳҳои январ-октябри соли 2014 ҳаҷми умумии муомилоти моли Тоҷикистон бо кишварҳои Аврупо 766 млн. доллари ИМА-ро ташкил додааст, ки 267 млн. доллари ИМА ба содироти маҳсулоти Тоҷикистон ба Аврупо ва 499 млн.доллари ИМА ба воридоти маҳсулоти аврупоӣ ба кишвари мо рост меояд.
Ба иттилои манбаъ, дар ин давра ҳаҷми муомилоти моли Тоҷикистон бо Австрия – 52%, Булғористон – 60%, Сан-Марино 62% ва Латвия – 21% афзудааст. Ҳаҷми воридоти мол аз Юнон – 7,3 баробар, Испания – 5,3 баробар, Хорватия – 2,6 баробар ва Шветсия – 6,4 баробар зиёд шудааст.
Тибқи маълумоти Вазорати рушди иқтисод ва савдои ҶТ, аз Тоҷикистон ба Аврупо асосан зардолуқоқ, нахи пахта ва маснӯот аз пахта содирот шуда, аз Аврупо ба Тоҷикистон асосан автомашинаҳо, доруворӣ ва таҷҳизоти он, техника ва ғайра ворид карда мешавад.
