Вобаста ба баланд шудани эҳтиёҷоти бозори дохилӣ ва зиёд шудани шумораи истеъмолкунандагони гази моеъ, ки имрӯз аз ҷониби истеъмолкунандагон, бахусус ронандагон ҳамчун сӯзишвории алтернативӣ истифода бурда мешавад, ҳаҷми воридоти он ба ҷумҳурӣ афзуда, аммо имрӯз мушоҳида мешавад, ки нархи чаканаи гази моеъ дар нуқтаҳои фурӯши сӯзишворӣ баланд аст, ки ҳолати мавҷуда боиси нигаронии истеъмолкунандагон шудааст.
Ширкати «Фароз», ки пешсафи ҷумҳурӣ дар соҳаи воридоти гази моеъ ва маводи сӯхт мебошад, иқдом гирифтааст, ки дар фасли зимистон нархи чаканаи гази моеъро аз 3,2 сомонӣ то ба 2,5 сомонӣ барои як литри он коҳиш диҳад.
Тавре аз хадамоти матбуоти ширкати «Фароз» хабар доданд, иқдоми мазкур яккарата набуда, минбаъд ширкат тамоми имкониятҳои мавҷудаи худро баҳри таъмини мунтазами бозори дохилӣ бо маводи сӯзишворӣ ва бо кафолати нархи дастрас пешкаши аҳолии ҷумҳурӣ намудани он мусоидат менамояд.
Гуфта мешавад, ширкати «Фароз» дорои инфрасохтори зарурӣ барои амалӣ намудани иқдоми мазкур аз қабили бузургтарин захираҷоҳои махсус барои нигоҳдории гази моеъ, шабакаи васеи нуқтаҳои фурӯши он дар тамоми минтақаҳои ҷумҳурӣ буда, манфиатҳои ҷамъиятро сармашқи фаъолияти худ қарор додааст.
Бино ба маълумоти Кумитаи рушди иқтисод ва савдои ҶТ, тайи солҳои ахир дар робита ба болоравии арзиши бензин ва сӯзишвории дизелӣ, қариб нисфи нақлиёти автомобилии ҷумҳурӣ ба истифодаи гази моеъ ба сифати сӯзишворӣ гузаштанд.
Тибқи маълумоти Агентии омори назди президенти ҶТ, дар зарфи 10 моҳи соли гузашта ба Тоҷикистон 130 ҳазор тонна гази моеъ ворид карда шудааст. Воридоти ин навъи сӯзишворӣ ба ҷумҳурӣ асосан аз Қазоқистон ва дар ҳаҷми начандон зиёд аз Русия сурат мегирад.
