Палатаи поёнии парлумони Тоҷикистон имрӯз созишнома миёни кишварҳои узви Созмони ҳамкории Шанхай (СҲШ) дар бораи фароҳам сохтани шароити мусоид барои боркашонии байнулмилалии автомобилиро тасдиқ намуд.
Ба гуфтаи муовини аввали вазири нақлиёти ҷумҳурӣ Шералӣ Ганҷалзода, масъалаи таҳияи механизмҳои амалисозии созишномаи мазкур муддати 10 сол аз ҷониби коршиносони СҲШ мавриди баррасӣ қарор гирифта буд.
«Дар созишнома таъмини устувории транзити борҳо тариқи қаламрави кишварҳои узви СҲШ, соддакунии бақайдгирӣ, дастрасии раводид ва иштироки кишварҳо дар бунёди зербинои нақлиётӣ дар қаламрави дигар давлатҳои узви созмон дар назар буда, ҳамчнуин хатсайри ҳамлу нақли бор тавассути нақлиёти автомбилӣ аз Чин ба Тоҷикистон бо роҳи мошингарди Урумчӣ – Душанбе муайян карда шудааст», – қайд кард муовини аввали вазири нақлиёт.
Зимнан зикр гардид, ки дар созишнома ҳамчунин озод кардани иштирокчиёни он аз пардохти андоз аз истифодаи роҳҳои автомобилгард низ пешбинӣ шудааст.
