Рӯзи 8 феврал маросими сабти расмии номзадҳо ба вакилӣ дар палатаи поёнии парлумон аз ҳавзаҳои якмандатии интихоботӣ ба итмом расид.
Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки нимаи имрӯз КМИР шумори номзадҳо ба вакилӣ дар Маҷлиси намояндагони Маҷлиси Олии ҶТ аз ҳавзаҳои якмандатии интихоботиро, ки расман ба қайд гирифта шуда, барои курсии вакилӣ рақобат мекунанд, пешкаши ҳамагон мегардонад.
Додозода хотиррасон намуд, ки ба 41 курсии вакилӣ дар палатаи поёнии парлумон аз ҳавзаҳои якмандатии интихоботӣ 212 нафар номзадҳо пешбарӣ шудаанд.
Ба гуфтаи ӯ, сабти расмии номзадҳо ба вакилӣ тибқи рӯйхати ҳизбӣ аз ҳавзаи ягонаи умумиҷумҳуриявӣ комилан ба анҷом расида, ба 22 курсии парлумонӣ аз аҳзоби сиёсӣ 103 нафар номзадҳо ба қайд гирифта шудаанд.
