Зимни муаррифии гузориш дар бораи давраи гузариш ва пешгӯии иқтисодии Бонки аврупоии таҷдид ва рушд (БАТР) дар Душанбе санаи 9-уми феврал сариқтисодчии бонки мазкур оид ба Осиёи Марказӣ Агрис Прейманис иттилоъ дод, ки ҳаҷми интиқоли маблағҳои пулӣ аз Русия ба Тоҷикистон дар соли гузашта тақрибан дар сатҳи соли 2013 боқӣ монд.
«Мо алҳол коҳиши босуръати ҳаҷми интиқоли маблағҳои пулиро мушоҳида намекунем, вале буҳрон дар Русия дар ҳоли афзоиш аст ва шояд ин ҳолат давоми сол ба вуҷуд ояд», – иброз дошт номбурда.
Тибқи маълумоти БАТР, давоми 9 моҳи соли гузашта ҳаҷми интиқоли маблағҳои пулӣ аз Русия ба Тоҷикистон 3 млрд. 16 млн. доллари ИМА-ро ташкил додааст, ки нисбат ба нишондиҳандаи ҳамин давраи соли гузашта ҳамагӣ 1% (9 моҳи соли 2013 – 3 млрд. 45 млн. доллари ИМА) камтар аст.
Прейманис қайд кард, ки имрӯз иқтисоди Тоҷикистон ба интиқоли маблағҳои пулӣ зиёд вобаста аст ва «ҳукумати Тоҷикистон инро эътироф мекунад». «Барои кам кардани вобастагии иқтисоди кишвар аз интиқоли маблағҳои пулӣ рушди бахши дохилӣ зарур аст», – пешниҳод кард иқтисодчии БАТР.
Намояндаи бонк коҳиши ҳаҷми интиқоли маблағҳои пулӣ ба Тоҷикистон дар соли 2015-ро пешгӯӣ карда, дар ҳамин ҳол шарҳ дод, ки ӯ «дар бораи комилан аз байн рафтани ин низом» ҳарф намезанад.
