Имрӯз дар Вазорати саноат ва технологияҳои нави Тоҷикистон вохӯрии вазири саноат ва технологияҳои нави ҷумҳурӣ Шавкат Бобозода бо сафири навтаъйини Ҷумҳурии Сотсиалистии Ветнам ҷаноби Фан Ван Фао баргузор гардид.
Бино ба иттилои хадамоти матбуоти Вазорати мазкур, зимни мулоқот, сафир ҳадафи асосии талошу кӯшишҳои минбаъдаашро пеш аз ҳама дар самти таҳким ва густариш бахшидани ҳамкориҳо ва муносибатҳои дуҷониба арзёбӣ намуда, изҳори боварӣ намуд, ки тамоми саъю нерӯи худро дар бахши тақвияти равобити соҳаи саноат ва технологияҳои нав равона хоҳад кард.
Гуфта мешавад, вазири саноат ва технологияҳои нави Тоҷикистон доир ба соҳаҳои саноат, бахусус соҳаи нассоҷӣ ва дӯзандагӣ, фазои мусоиди сармоягузорӣ дар ҷумҳурӣ ва мавҷуд будани захираҳои зиёди ашёи хом ибрози назар намуда, роҳандозии ҳамкориҳои судманд дар самтҳои зикргардидаро мувофиқи мақсад арзёбӣ намуд.
Зимнан зикр мегардад, ки ҷонибҳо аз натиҷаи вохурӣ изҳори қаноатмандӣ намуда, ҳамчунин иброз доштанд, ки густариш додани ҳамкориҳои дуҷониба ба манфиати тарафайн хоҳад буд.
