Ҳудуди 3 ҳазор нафар мансабдорони давлатӣ, тоҷирони муваффақ, сармоягузорон, рӯзноманигорон ва намояндагони аҳли ҷомеа рӯзҳои 2-5 май дар
Маҷлиси 48-уми солонаи
Шӯрои мудирони Бонки осиёгии рушд (БОР) дар шаҳри Боку гирдиҳам меоянд.
Дар ин маҷлис иштироки ҳайати ҷумҳурӣ бо роҳбарии муовини аввали нахуствазири Тоҷикистон Давлаталӣ Саидов низ дар назар аст.
Мавзӯи маҷлиси соли 2015 – «Шарикӣ барои рушд» аст, ки муҳимияти сафарбарии захираҳо ва тақвияти шарикӣ миёни БОР, кишварҳо ва дигар шарикони бисёрҷонибаву дуҷонибаро таъкид менамояд.
Дар чорабиниҳои маҷлиси солонаи Шӯрои мудирони БОР масъалаҳои имконоти рушди минтақаи Осиё ва Уқёнуси Ором, роҳандозии сиёсатҳои мутобиқ ба муҳити тағйирёбандаи дохиливу беруна ҷиҳати нигоҳдориву таъмини рушди устувори иқтисодӣ ва коҳиши минаъдаи камбизоатӣ, муҳайё кардани шароити созгор барои рушди бахши давлатӣ-хусусӣ, фарогирии умумии бахши тандурустӣ, баробарии ҳуқуқҳои занону мардон, инноватсияҳо ва дигар масъалаҳои муҳим баррасӣ мешаванд.
Ёдрас мекунем, ки Тоҷикистон соли 1998 ба узвияти Бонки осиёгии рушд пазируфта шуда, то имрӯз БОР барои Тоҷикистон дар ҳаҷми умумии ҳудуди 1,3 млрд. доллари ИМА кумакҳо ба сифати қарзу бурс ва ёрии техникиро маъқул шуморидааст.
