– Ноамн шудани вазъ, ҷамъшавии нерӯҳои Толибон дар музофоти Қундузи Афғонистон, ки имрӯз дар он ҷо муҳорибаҳои хунин миёни нерӯҳои ҳукумат ва ҷангиёни ҳаракати Толибон ҷараён доранд, ҳанӯз соли гузашта шурӯъ шуда буд ва аз ин ҳам дар ҳукумати Афғонистону ҳам дар нерӯҳои эътилофи байнулмилалӣ (НАТО) ва ҳам дар кишварҳои ҳаммарз бо ин музофот огаҳӣ доштанд, вале ҷиҳати пешгирии он тадбирҳо андешида нашуданд, – иброз дошт дар мусоҳиба ба хабарнигори «Азия-Плюс» коршиноси тоҷик оид ба вазъ дар Афғонистон Қосимшо Искандаров.
«Имрӯз нерӯҳои ҳукумат дар Қундуз алайҳи ҷангиёни ҳаракати Толибон амалиёти густардаеро роҳандозӣ намудаанд ва ба назари ман, дар ин амалиёт онҳо метавонанд барои як муддате муваффақ шаванд, вале вазъро ба муҳлати зиёдтар ба эътидол оварда наметавонанд», – қайд кард коршинос.
Ба гуфтаи ӯ, имрӯз барои таъмини амну субот дар Қундуз ҳукуматдорони Афғонистон аз ҳарвақта дида бештар ба кумаки беруна ва қабл аз ҳама, ба кумаки низомӣ, дастгирӣ аз ҷониби аҳолии маҳаллӣ ва кадрҳои соҳибтаҷрибаи низомӣ ниёз доранд.
«Даргириҳо дар музофоти Қундузи ҳаммарз бо вилояти Хатлони Тоҷикистон бевосита ба марзҳои ҷанубии кишвари мо хатар эҷод мекунанд ва ҳукумати Тоҷикистону иттифоқчиёнашро зарур аст, ки ба ҳама гуна сенарияҳои идомаи ҷанг дар назди марзҳои мо омода бошанд», – афзуд номбурда.
Қобили зикр аст, ки тайи 3 шабонарӯзи ахир дар Қундуз муҳорибаҳои шадид идома дошта, бар асари он на камтар аз 45 нафар ҷангиён кушта шудаанд, ки миёни онҳо зодагони Тоҷикистону Чеченистон низ ҳузур доштанд. Аз нерӯҳои ҳукумат низ 12 нафар ҳалоку захмӣ шуданд.
Тибқи маълумоти ВАО-и Афғонистон, дар робита ба ноамн шудани вазъ дар Қундуз, президенти кишвар Муҳаммад Ашраф Ғанӣ маҷбур шудааст, ки сафари имрӯзааш ба Ҳиндустонро мавқуф гузорад.
