Вазорати корҳои хориҷии Ҷумҳурии Тоҷикистон бо изтироб вазъи башарии Непалро баъди заминларза назорат карда, аз шаҳрвандони Тоҷикистон, ки дар қаламрави ин кишвар қарор доранд, даъват ба амал меорад, то эҳтиёткор бошанд.
Бино ба маълумоти дпартаменти иттилооти ВКХ Тоҷикистон, ҳоло сафорати Ҷумҳурии Тоҷикистон дар Ҷумҳурии Ҳиндустон ва сафорати Ҷумҳурии Тоҷикистон дар Федератсияи Россия ҷиҳати таъмини амнияти шаҳрвандони Тоҷикистон чораҳои лозима меандешанд ва бо онҳо дар тамосанд.
Гуфта мешавад, Вазорати корҳои хориҷии Тоҷикистон ҳамаи чорабиниҳои зарурӣ ва имконоти мавҷударо доир ба берун овардани шаҳрвандони Тоҷикистон аз минтақаи офатзада меандешад.
Зимнан зикр мегардад, ки ҳамчунин масъалаи мусоидат намудан дар баровардани шаҳрвандони Тоҷикистон тавассути Вазорати ҳолатҳои фавқулодаи Федератсияи Россия муҳокима мегардад.
Ёдрас мекунем, ки рӯзи 27 апрел президенти Тоҷикистон Эмомалӣ Раҳмон дар робита ба ҳодисаи заминларза дар кишвари Непал, ки боиси ҳалокати ҳазорон шаҳрвандон ва хисороти бузурги моддӣ гардид, ба Президенти ин кишвар Рам Баран Ядав барқияи тасаллият ирсол намуд.
Қобили зикр аст, ки тибқи иттилои ахир, бар асари ин заминларза дар Непал 3218 нафар ҳалок ва на камтар аз 6538 нафари дигар осеб дидаанд.
