Хешону наздикони фармондеҳи ОМОН ВКД Тоҷикистон Гулмурод Ҳалимов, ки аз пайвастанаш ба сафҳои ДИИШ хабар дод, хеле дар шигифтанд.
Баъди аз худ хабар додан ва муроҷиат тариқи видео дар шабакаҳои иҷтимоӣ, хабарнигори «Азия-Плюс» ба зодгоҳи Гулмурод Ҳалимов – Дараи Фонӣ раҳсипор шуд. Дар он ҷо маълум шуд, ки ҳамсари полковники фирорӣ чанде дар хонаи волидонаш ба сар бурда, ҳамроҳи кӯдаконаш ба манзили худашон баргаштааст. Аз ин рӯ, бародарони Ҳалимов ба ворид шудани мо ба ин манзил монеъ шуда, изҳор намуданд, ки ҳамсари полковник аз ин ҳодиса бехабар аст ва онҳо аз вазъи солимии бе ин ҳам на он қадар хуби ӯ дар ташвишанд.
Назир Ҳалимов, бародари Гулмурод иброз дошт, ки аз ин хабар ҳамаи хешону наздикон хеле ба шигифт омаданд. Ӯ хеле мондашуда ва ғазаболуд ба назар мерасид. Эҳтимол наздикони полковникро аллакай бозпурсӣ карда бошанд.
Дар ҷамоати маҳаллӣ ва мактаби таҳсилкардаи Ҳалимов низ бо мо хуб муомила накарда, раиси ҷамоат моро тарк кард ва директори мактаб гуфт, бе иҷозати боло ҳарфе дар бораи Ҳалимов нахоҳад гуфт.
Дар ҳамин ҳол, Назир Ҳалимов қаблан дар мусоҳиба ба радиои «Озодӣ» изҳор кард, ки чеҳраву суханронӣ дар навори нашршуда ба бародараш шабоҳат дорад, аммо «риши ӯ хеле шубҳабарангез аст, зеро рӯи ӯ ҳеҷ гоҳ чунин риш намебаровард».
Др ҳоле, ки дар ин навор Гулмурод Ҳалимов аз сафарҳояш ба Амрико ва Русия қисса карда, бо нафрат ёд мекунад, бародараш мегӯяд, ёд дорад, ки пас аз бозгашт аз сафараш ӯ Амрикоро хеле васф карда буд.
«Русия солҳои 2003 ё 2004 рафта буд. Чун мо Русияро дида будем, аз Русия чизе намегуфт, аммо вақте аз Амрико баргашт, ин кишварро хеле таъриф карда буд. Гуфта буд, ки кору зиндагиашон хеле зӯр аст», – гуфтааст Назир Ҳалимов.
Гулмурод Ҳалимов соли 1975 дар ноҳияи Варзоб ба дунё омада, солҳои ҷанги шаҳрвандӣ дар Тоҷикистон дар сафҳои Гвардияи миллӣ хизмат кардааст. Пас аз гирифтани маълумот, дар низоми ВКД Тоҷикистон кор карда, аз унвони сержант то ба рутбаи половник ва фармондеҳи ОМОН расидааст. Ӯ дар амалиётҳо муқобили гурӯҳҳои мусаллаҳи ғайриқонунӣ дар Рашту Хоруғ ширкат варзидааст. Оиладор ва соҳиби 8 фарзанд мебошад.
Дар ҳамин ҳол, сардори Раёсати муносибатҳои байнулмилалӣ, таъминоти ҳуқуқӣ ва маркази иттилооти Прокуратураи генералии Тоҷикистон Манучеҳр Маҳмудзода ба «Азия-Плюс» хабар дод, ки айни замон ҷиҳати таҳқиқи ҳамаи маълумоти мавҷуда нисбати фармондеҳи ОМОН ситод таъсис дода шудааст. Ба ҳайати ситод кормандони ВКД, Прокуратураи генералӣ ва Кумитаи давлатии амнияти миллӣ шомил шудаанд.
Ба гуфтаи Маҳмудзода, танҳо баъди омӯзишу таҳлили ҳамаи маълумоти мавҷудаи дар ихтиёри сохторҳои қудратӣ қарор дошта, ки на танҳо аз навори видеойӣ иборат аст, аз рӯи ин ҳодиса парвандаи ҷиноӣ боз мешавад.
