Имрӯз барои хатмкунандагони мактабҳои миёнаи таҳсилоти умумии Тоҷикистон «Занги камолот» садо медиҳад.
Мутобиқи фармони вазири маориф ва илми ҷумҳурӣ, чорабинии «Занги камолот» дар ҳамаи муассисаҳои таҳсилоти умумӣ дар доираи 45 дақиқа, аз соати 8-00 то соати 8-45 гузаронида шуда, машғулиятҳо тибқи ҷадвали дарсҳо баргузор карда мешаванд.
Дар чорабинии мазкур гузаронидани ҳама гуна шабнишинӣ, зиёфатороиву туҳфаситонӣ, ҷамъоварии маблағ, овехтан ва оро додани худ бо лентаҳои ороишӣ ва зангӯла, омадан бо мошинҳои шахсӣ, ба сайругашт, тарабхона рафтани хонандагон қатъиян манъ шудааст.
Чорабинии «Занги камолот» танҳо бо иштироки хонандагони синфҳои 9 ва 11 ташкил карда шуда, ғолибони олимпиадаҳои ҷумҳуриявӣ, озмунҳои байналмилалӣ ва
мусобиқаҳои варзишӣ бо ифтихорнома ва туҳфаҳои хотиравӣ қадрдонӣ мешаванд.
Қобили зикр аст, ки соли равон мактабҳои таҳсилоти умумиро 111 ҳазору 620 нафар хонандагони синфи 11 ва 167 ҳазору 603 нафар толибилмони синфи 9 хатм мекунанд.
Соли сеюм аст, ки «Занги камолот» дар Тоҷикистон аввали моҳи июн баргузор мешавад. Ин тасмим ба он хотир гирифта шудааст, ки тамоми барномаи 34-ҳафтаинаи таҳсил иҷро гардад, зеро хонандагони мактабҳои таҳсилоти умумӣ бидуни таътили тирамоҳиву баҳорӣ таҳсил мекунанд, вале муддати як моҳи зимистон истироҳат мекунанд.
Ёдрас мекунем, ки шурӯъ аз соли 2007 мувофиқи фармоиши президенти Тоҷикистон, бо мақсади сарфаи хароҷот аз ҷониби волидайн ва таъмини амнияти хатмкунандагон, баргузории чорабиниҳои мактабӣ бахшида ба «Занги охирин» ва «Иди алифбо» ва ҳамчунин доир сохтани сайругашти хатмкунандагон бо мошинҳо дар ҳудуди шаҳру ноҳияҳо ва мавзеъҳои истироҳатӣ мамнӯъ эълон гардид.
