Нимаи дуюми рӯзи 5 июн Президенти кишвар Эмомалӣ Раҳмон вазири кишвари Ҷумҳурии Исломии Эрон Абдурризо Раҳмонии Фазлиро, ки ба ҳайси намояндаи кишвари нозир дар Созмони ҳамкории Шанхай барои иштирок дар ҳамоиши навбатии Шӯрои вазирони корҳои дохилӣ ва амнияти ҷамъиятии давлатҳои аъзои ин созмон ба Тоҷикистон ташриф овардааст, ба ҳузур пазируфт.
Бино ба иттилои хадамоти матбуоти сарвари давлат, дар мулоқот аз рушди ҳамкории миёни Вазорати корҳои дохилии Ҷумҳурии Тоҷикистон ва Вазорати кишвари Ҷумҳурии Исломии Эрон, ки тайи даҳ соли охир мунтазам густариш ёфта, алҳол дар оғози марҳилаи сифатан наву баландтар қарор дорад, изҳори қаноат карда шуд.
Сарвари давлати Тоҷикистон ҳамчунин аз заминаи қарордодию ҳуқуқии ҳамкорӣ дар соҳаи муборизаи муштарак бо ҷинояткорӣ изҳори қаноат намуда, ҳамзамон таъкид дошт, ки барои татбиқи амалии санадҳои имзошуда ҷаҳди бештар бояд кард.
Ҳамчунин ба масоили рушди ҳамкории сеҷонибаи Тоҷикистону Эрону Афғонистон дар соҳаи мубориза бо терроризму ифротгароӣ ва назорати маводи мухаддир таваҷҷуҳи зиёд зоҳир гардид.
