Рӯзи 6 июн вазири корҳои дохилии Тоҷикистон генерал-лейтенанти милитсия Раҳимзода Рамазон Ҳамро бо вазири корҳои дохилии Русия генерал-полковники политсия Владимир Колоколсев дидору гуфтушунид кард.
Дафтари матбуоти ВКД Тоҷикистон дар шарҳи ин хабар менависад, зимни вохӯрии дуҷониба масъалаҳои пешгирии ҷалби шаҳрвандони Тоҷикистон ба ҳар гуна равия ва гурӯҳҳои ифротгаро дар Русия ва зиёд намудани шумораи курсантон дар Донишгоҳҳои олии ин кишвар мавриди баррасӣ қарор гирифтанд.
Ба иттилои манбаъ, Владимир Колоколсев изҳор намудааст, ки ҷиҳати пешгирии шомилшавии шаҳрвандони Тоҷикистон ба ҳизбу ҳаракатҳои ғайриқонунӣ дар қаламрави Русия тадбирҳои мушаххас андешида хоҳад шуд.
Гуфта мешавад, дар ҷараёни вохӯрӣ зикр гардидааст, ки ҷонибҳо барои боз ҳам тақвият додани ҳамкориҳо дар самти мубориза бар зидди ҷинояту ҷинояткорӣ, мубодилаи иттилоот ва омода намудани кадрҳои баландихтисос ҳамеша омодаанд.
