Имрӯз 23 июл дабири кулли Федератсияи футболи Тоҷикистон (ФФТ) Ислом Маҳмадшоев пас аз бемории вазнин дар синни 36-солагӣ аз олам даргузашт.
«Дарки талаф додани чунин шахси хубу некдил бароямон хеле мушкил аст. Даргузашти Ислом Маҳмадшоев талафоти вазнин барои касонест, ки аз наздик бо ӯ ошноӣ доштанд. Хотираи неки ӯ ҳамеша дар қалбҳои мо зинда хоҳад монд», – қайд мешавад дар ин робита дар сомонаи расмии ФФТ.
Маҳмадшоев Ислом Иззатуллоевич 1 майи соли 1980 дар Фархор ба дунё омадааст. Аз соли 1997 то соли 1997 дар сафҳои артиши Тоҷикистон адои хизмат кардааст. Маълумоташ олӣ буда, хатмкардаи Донишгоҳи давлатии тиҷорати Тоҷикистон аст.
Дар сохтори Федератсияи футболи Тоҷикистон аз соли 2004 ба ҳайси сармутахассиси шуъбаи байнулмилалӣ ба фаъолият шурӯъ кардааст. Аз соли 2009 – ёвари дабири кулл ва аз соли 2012 – сардори шуъбаи байнулмилалии Федератсия. Санаи 2 июли соли 2013 дабири кулли ФФТ таъин гардид. Аз соли 2010 – комиссари Конфедератсияи футболи Осиё (АФК) ва аз соли 2011 – комиссари Федератсияи байнулмилалии футбол (ФИФА).
Оиладор ва соҳиби 4 фарзанд – 3 духтару 1 писар.
