Вазорати рушди иқтисод ва савдои Тоҷикистон рушди иқтисоди кишвар аз рӯи натиҷаҳои соли равонро дар сатҳи 6,4% пешгӯӣ мекунад.
Вазири рушди иқтисод ва савдои ҷумҳурӣ Неъматулло Ҳикматуллозода зимни нишасти хабарии имрӯза дар ин робита изҳор намуд, ки созмонҳои байнулмилалӣ рушди иқтисоди Тоҷикистон дар соли ҷориро дар сатҳи 3% пешгӯӣ мекунанд, вале аз рӯи натиҷаҳои нимсолаи аввал он 6,4%-ро ташкил дод ва мувофиқи пешгӯиҳои вазорат, аз рӯи натиҷаҳои солона низ сатҳи рушд дар ҳамин сатҳ боқӣ хоҳад монд. «Пешгӯиҳои мо маъмулан ба воқеъият наздиктаранд», – таъкид дошт ӯ.
Ҳикматуллозода қайд кард, ки аз рӯи натиҷаҳои нимсолаи аввал мизони таваррум дар бахши истеъмолӣ ҳамагӣ 2,6%-ро ташкил додааст, ки «нишондиҳандаи хуб» аст.
Ба гуфтаи ӯ, то охири сол сатҳи таваррум аз 7% зиёдтар намешавад. «Соли оянда низ сатҳи таваррумро дар ҳамин сатҳ пешбинӣ дорем», – иброз дошт вай.
Дар ҳамин ҳол, вазир таъкид дошт, ки мувофиқи пешгӯиҳои вазорат, соли оянда афзоиши Маҷмӯи маҳсулоти дохилии ҷумҳурӣ дар сатҳи 7% боқӣ мемонад. «Кишвари мо аз имконоти зиёди истифоданашуда бархурдор аст, ки ба мо барои расидан ба ин нишондиҳандаҳо кумак мекунад», – афзуд номбурда.
