Имрӯз намояндагони Ҷумҳурии Исломии Эрон таҳти роҳбарии полковник Самади Аббосӣ аз хадамоти «Интерпол»-и ин кишвар, полковник Алиризо Манучеҳри Ободӣ – сардори бахши омӯзиши байналмиллалии Донишгоҳи улуми Эрон ва полковник Муҳаммадсодиқи Маҷидӣ – муовини вобастаи низомии Сафорати Эрон дар Тоҷикистон ба Вазорати корҳои дохилии Ҷумҳурии Тоҷикистон ташриф оварда, аз Бюрои Марказии Миллии «Интерпол»-и Вазорати корҳои дохилӣ боздид намуданд.
Бино ба иттилои маркази матбуоти ВКД Тоҷикистон, меҳмононро сардори Бюрои Марказии Миллии «Интерпол» подполковники милитсия Машрабзода Ҷамшеди Хол пешвоз гирифт.
Дар толори маҷлисгоҳ вобаста ба фаъолияти хадамотҳои «Интерпол»-и Тоҷикистону Эрон вохӯрӣ анҷом дода шуд.
Дар ҳамоиши мазкур масъалаҳои марбут ба мубориза алайҳи ҷинояткорӣ, роҳҳои пешгирии амалҳои ҷинояткорона ва дар ин самт ба роҳ мондани ҳамкориҳои мутақобилан судманди дуҷониба миёни хадамотҳои дахлдори ду кишвар, мубодилаи таҷриба ва дигар мавзӯҳои мавриди таваҷҷӯҳ таҳти баррасӣ қарор дода шуданд.
Пас аз вохӯрӣ, ҳайати намояндагони Ҷумҳурии Исломии Эрон аз утоқҳои кории кормандони БММ «Интерпол»-и Тоҷикистон дидан намуда, бо шароити кории кормандони ин ниҳод шиносоӣ пайдо намуданд.
