Бахшида ба таҷлили 24-умин солгарди Истиқлолияти Ҷумҳурии Тоҷикистон Раёсати бозрасии давлатии автомобилии Вазорати корҳои дохилӣ санаи 7-уми сентябри соли 2015, дар Автодроми автоматикунонидашудаи ба номи А.Турсунов, воқеъ дар километри 7-уми кӯчаи С.Айнии шаҳри Душанбе озмуни «Пиёдагарди намунавӣ» баргузор менамояд.
Бино ба иттилои маркази матбуоти ВКД Тоҷикистон, озмун бо мақсади ҷалб намудани таваҷҷӯҳи аҳолии кишвар дар самти таъмини бехатарии ҳаракат дар роҳ, таблиғи Қоидаҳои ҳаракат дар роҳ, таҷрибаи гаштугузори бехатари пиёдагардон дар ҷараёни ҳаракат дар роҳ, такмили шаклу усулҳои таблиғот оид ба пешгирии ҳодисаҳои роҳу нақлиёт, баланд бардоштани мавқеи пиёдагардон, ҳамчун иштирокчиёни ҳаракат дар роҳ гузаронида мешавад.
Даври якум бевосита дар кӯчаву хиёбонҳои шаҳри Душанбе то санаи 3-юми сентябри соли 2015 гузаронида мешавад.
Даври дуюм санаи 7 сентябри соли 2015, соати 9.00 бо иштироки 5 нафар ғолибони даври якум дар Автодроми автоматонидашудаи ба номи А.Турсунови ш.Душанбе доир мегардад.
Шумораи иштирокчиён барои даври якум бе маҳдуд буда, тамоми хоҳишмандон – шаҳрвандони Ҷумҳурии Тоҷикистон иштирок карда метавонанд.
Дар озмун ба иштирокчиёне, бартарӣ дода мешавад, ки талаботи Қоидаҳои ҳаракат дар роҳ нағз донанд, дар ташвиқу тарғиби бехатарии ҳаракат дар роҳҳои ҷумҳурӣ саҳм дошта бошанд.
Барои ғолибони озмун 5 ҷой бо мукофотҳои пулӣ муқаррар карда мешавад.
Ёдрас мекунем, ки қабл аз ин Раёсати БДА ВКД Тоҷикистон барои ронандагони воситаҳои нақлиёти кишвар
озмуни «Ронандаи намунавӣ»
низ эълон кард.
