Нимаи дуюми соли равон дар яке аз зеботарин дараҳои Помир – Вездара, ки дар ноҳияи Роштқалъаи ВМК воқеъ аст, Ҷашнвораи табиати зинда доир мегардад.
Сардори Раёсати ҳифзи муҳити зисти ВМКБ Мулкамон Назаралиев ба «Азия-Плюс» дар ин робита иттилоъ дод, ки мавзӯи меҳварии ҷашнвора шиносоӣ бо усулҳои шикори маъмулии помириҳо ва ҳифзи ҳайвоноти ваҳшии минтақа аст.
Ба гуфтаи ӯ, ин чорабинии якрӯзаи экологиву маърифатӣ ва фарҳангӣ ба эҳёву таблиғ ва табодули мероси ғании наслҳои пешин оид ба усулҳои шикор, омӯзишу шиносоӣ бо донишу малакаҳои маъмулии мардуми Помир оид ба ҳифз ва истифодаи табитати зинда ва ҳамчунин ҷалби сайёҳони экологӣ ба минтақа мусоидат мекунад.
«Дар ҷашнвора кӯдакону наврасон, шикорчиёни соҳибтаҷриба, фаъолони ҷамоатҳо аз минтақаҳои вилоят ширкат варзида, ҳамчунин аз иштироки меҳмонони сершумори хориҷӣ, аз ҷумла сайёҳон интизорӣ меравад», – иброз дошт ӯ.
Зимнан зикр гардид, ки ҷашнвораи мазкур бо ташаббуси Раёсати ҳифзи муҳити зисти ВМКБ, ҳукумати ноҳияи Роштқалъа дар ҳамдастӣ бо иттиҳодияи ҷамъиятии «Кӯҳҳои Помир», Иттиҳоди журналистони Тоҷикистон, ҶСП «ТТ Мобайл» ва ширкатҳо дар соҳаи шикори «Барс» ва «Восток» созмон дода мешавад.
