Нахуствазири Тоҷикистон Қоҳир Расулзода рӯзи 25 август бо роҳбарони як қатор вазорату идораҳои ҷумҳурӣ машварати корӣ баргузор намуд.
Бино ба маълумоти котиботи нахуствазир, Қоҳир Расулзода ба вазорату идораҳои дахлдор дастур додааст, ки дар бораи таъсиси комиссияи доимо амалкунандаи назди ҳукумат оид ба мусоидат ба истеҳсоли молу маҳсулоти ивазкунандаи маҳсулоти воридотӣ ва афзоиши содироти маҳсулоти ватанӣ хулосаҳои асоснок омода кунанд.
Нахуствазир тақозо намудааст, ки дастурҳо аз паёми президент ба парлумон аз 23 январи соли равон дар самти мусоидат ба истеҳсоли молу маҳсулоти ватании ивазкунандаи воридот ва дастгирии соҳибкорони ватанӣ бояд бечуну чаро иҷро шаванд.
Ғайр аз ин, бо назардошти вазъи сиёсӣ дар минтақаҳои гуногуни ҷаҳон, таъсири буҳрони моливу иқтисодии ҷаҳонӣ, ноустувории вазъ дар бозорҳои ҷаҳонии молӣ ва ашёи хом ва ҳамчунин дигар омилҳое, ки ба рушди иқтисоди ҷумҳурӣ таъсири манфӣ мерасонанд, нахуствазир дастур додааст, ки барои ҳимоя аз иқтисоли миллӣ тадбирҳои таъҷилӣ рӯйи кор гирифта шаванд.
