Раиси шаҳри Душанбе Маҳмадсаид Убайдуллоев рӯзи 19 октябр ҷаласаи васеи мақомоти шаҳрдориро доир намуда, дар ҷараёни он нишондиҳандаҳои рушди иқтисодиву иҷтимоии шаҳр дар зарфи 9 моҳи соли равон баррасӣ шуданд.
Тавре ба «Азия-Плюс» як манбаъ аз мақомоти шаҳрдории Душанбе дар ин робита иттилоъ дод, раиси пойтахт дар ҷаласа қайд кард, ки нишондиҳандаҳои бадастовардашуда ба имконоти шаҳр ҷавобгӯ нестанд ва аз ин рӯ, ба муовини раиси шаҳр Шуҳрат Мақсудзода, раисони ноҳияҳои пойтахт, сардорони Раёсатҳои молия ва андоз супориш дод, ки дар муддати ду ҳафта ҷиҳати ҷамъоварии маблағҳои андози иҷтимоӣ дар шаҳр тадбирҳои муассир андешанд.
Маҳмадсаид Убайдуллоев аз ҳолати истифодаи 1111 гектар қитъаи замини, ки бо қарори палатаи болии парлумони ҷумҳурӣ аз ҳисоби ноҳияи Рӯдакӣ ба тавозуни пойтахт дода шудаанд ва 2381 гектар қитъаи замин дар қисмати ҷанубу шарқи пойтахт, ноҳияи Варзоб, ки низ ба ихтиёри шаҳр супурда шудаанд, нигаронӣ изҳор намуд.
Раиси пойтахт зикр кард, ки имрӯз ин заминҳо аз ҷониби раҳбарияти ноҳияҳоиРӯдакӣ ва Варзоб тибқи таъинот истифода намешаванд.
Барои ҳаллу фасли мушкилоти мазкур қарор шуд, ки аз рӯи ин масъала ба ҳукумати ҷумҳурӣ ва Прокуратураи генералии Тоҷикистон муроҷиат карда шавад.
