Мақомоти пулиси вилояти Свердловски Русия як шаҳрванди Тоҷикистонро боздошт намуданд, ки аз соли 2013 ба гумони даст доштан дар ғайриқонунӣ дастрас намудани қарзӣ бонкӣ ва сохтакории хидматӣ мавриди пайгарди байнулмилалӣ қарор дошт. Дар ин бора Сарраёсати ВКД Русия дар ин вилоят хабар медиҳад.
Тибқи маълумоти пешакӣ, аз моҳи декабри соли 2007 то моҳи феврали соли 2008 марди 50-сола бо раҳбарияти яке аз бонкҳо дар шаҳри Хуҷанд забон як карда, бо пешниҳоди ҳуҷҷатҳои қалбакӣ 1,7 млн. сомонӣ қарз мегирад, ки ҳудуди 400 ҳазор доллари ИМА-ро ташкил медиҳад.
«Пулҳо гӯё барои сохтмони корхонаи хурди коркарди нахи пахта пешбинӣ шуда, 700 ҳазор сомонии он барои пардохти қарзи дигари ғайриқонунии пештар бо ин васила гирифташуда истифода мешавад. Боқимондаи маблағро ҷинояткорон байни худ тақсим кардаанд», – гуфтааст раҳбари хадамоти матбуоти мақомоти пулиси ин вилоят.
Гуфта мешавад, айни замон шаҳрванди боздоштшудаи Тоҷикистон дар ҳабс буда, масъалаи истирдодаш мавриди ҳаллу фасл қарор дорад.
Зимнан зикр мегардад, ки ӯро дар ноҳияи Белоярск, дар бӯстонсарое боздоштаанд, ки дар он ҷо ба ҳайси посбон кор мекардааст ва сипас аз шуъбаи пулиси шаҳри Заречний овардаанд.
