Дар ҷаласаи рӯзи 15 январи ҳукумати Қирғизистон лоиҳаи шартнома дар бораи аломатгузорӣ дар қисмате аз сарҳади давлатӣ бо Тоҷикистон дар масофаи ҳудуди 520 километр маъқул шуморида шуд. Дар ин бора
хадамоти матбуоти
ҳукумати Қирғизистон хабар медиҳад.
Зимни суханронӣ дар ҷаласаи мазкур муовини аввали нахуствазири ин кишвар Аали Карашев, ки ҳамзамон роҳбари комиссияи аломатгузорӣ ва таъйини сарҳад аст, изҳор доштааст, ки баррасии масъалаи аломатгузории сарҳади давлатӣ бо Тоҷикистон охири соли 1990 оғоз гардид.
«Лекин ҷонибҳо ба қарори ягона нарасиданд, солҳои 2000-ум корҳо дар ин самт идома ёфтанд, ин ҷараёни душвор аст, зеро омӯзиши маводи бойгонии чандин кишвар, ки дар харитаҳои топографӣ дарҷ шудаанд, зарур аст», – гуфтааст А.Карашев.
Ӯ таъкид доштааст, ки масъалаи аломатгузории сарҳади давлатии Қирғизистону Тоҷикистон «ба туфайли гуфтушуниди сарони кишварҳои ҳарду кишвар дар моҳи майи соли 2013 ба пешравӣ муваффақ шуд».
«Аз 971 километри умумӣ Комиссияи аломатгузорӣ ва таъйини сарҳади давлатии Қирғизистону Тоҷикистон 519,9 километри хатти марзи давлатиро мувофиқа карда, моҳи ноябри соли гузашта дар Бишкек тасмим гирифта шуд, ки санадҳои аломатгузории 519,9 километри зикршуда ба имзо расанд», – қайд кардааст А.Карашев.
