Суди гарнизони ҳарбии шаҳри Душанбе раиси комиссияи тиббии даъвати комисариати ҳарбии ноҳияи Сино ва табиби ин комиссияро, ки барои ба хизмати ҳарбӣ коршоям шумурдани наваскари гурдаҳояш дардманд Эмомиддин Холов айбдор карда мешаванд, ҷарима кард. Онҳо Э.Холовро моҳи апрели соли 2015 тариқи маҷбурӣ (облава) дар пойтахт боздошта, ба хизмати ҳарбӣ сафарбар карда буданд.
Адвокат Дилшод Ҷӯраев ба «Азия-Плюс» дар ин робита иттилоъ дод, раиси комиссияи тиббии комиссариати ҳарбии ноҳия Абдукарим Толибов ва табиби ин комиссия Матлуба Самадова мутобиқи моддаи 322 КҶ ҶТ (Хунукназарӣ) гунаҳкор эътироф гардида, дар ҳаҷми 4,8 ҳазор сомонӣ ҷаримабандӣ шудаанд.
Ғайр аз ин, роҳбари зершуъбаи комиссариати ҳарбӣ Алло Аллохӯҷаев ва ёвари комисари ҳарбии ноҳияи Сино Муродалӣ Сафаров низ мутобиқи моддаҳои 323 (Сохтакории хизматӣ) ва 391 (Суиистеъмоли ҳокимият ё мақоми хизматӣ, аз ҳадди ваколатҳои мансабӣ ва хизматӣ баромадан ё бефаъолиятии ҳокимият)-и КҶ айбдор дониста шуда, ҳар кадоме ба маблағи 10,4 ҳазор сомонӣ ҷарима шудаанд.
Алло Аллохӯҷаев аз вазифааш озод карда шуда, раиси комиссияи тиббӣ Абдукарим Толибов ва табиб Матлуба Самадова ҳамчунин ба муддати ду сол аз ҳуқуқи машғул шудан ба фаъолияти тиббӣ маҳрум карда шудаанд.
Нимаи моҳи феврал
дар ин робита иттилоъ дода будем
, ки парванда нисбати Абдукарим Толибов, раиси комиссияи тиббии даъвати комиссариати ҳарбии ноҳияи Сино ва Матлуба Самадова, табиби ин комиссия ба суд фиристода шудааст.
