Неъматулло Эмомзода, Сафири Ҷумҳурии Тоҷикистон дар Ҷумҳурии исломии Эрон 17 апрели соли равон зимни сафари корӣ ба устони Хуросони Разавӣ бо шаҳрвандону донишҷӯёни тоҷикистонӣ ва устодони Донишгоҳи Фирдавсии шаҳри Машҳад дидору мулоқот намуд.
Бино ба иттилои АМИТ «Ховар», сафири Тоҷикистон оид ба муҳтавои Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ва дастовардҳои кишвар дар давраи истиқлолият ба таври муфассал суханронӣ намуда, бахше аз мавзӯъҳои асосии Паёмро, ки ба соҳаи илму маориф ва масоили ҷавонон вобаста буданд, таъкид кард.
Ҳамзамон зимни дидор зикр гардид, ки моҳи майи соли равон ду маъракаи муҳими сиёсӣ- гузоштани санги асос ба бунёди лоиҳаи минтақавию интиқолии неруи барқ миёни Осиёи Марказӣ ва Ҷанубӣ (CASA-1000) ва раъйпурсии ҳамагонӣ барои ворид намудани тағйиру иловаҳо ба Конститутсияи ҶТ баргузор мегардад, ки он барои рушди минбаъдаи равандҳои демократикунонии ҳаёти ҷомеа ва рушди бемайлони соҳаҳои сиёсӣ, иқтисодӣ, иҷтимоӣ ва фарҳангӣ имконият фароҳам меорад.
Дар анҷоми мулоқот Н.Эмомзода донишҷӯёнро барои беҳтар аз худ кардани забонҳои хориҷӣ, омӯзиши фанҳои дақиқ ва технологияҳои муосир даъват кард.
Донишҷӯён зимни андешаронӣ аз иқдомҳои Ҳукумати Ҷумҳурии Тоҷикистон бо хушнудӣ ва рӯҳбаландӣ истиқбол намуда, барои таҳсили беҳтар ва ҳимояи ваҳдати миллӣ, оромиву осудагии кишвар омодагии худро баён доштанд.
