Дар доираи сафари корӣ ба ноҳияи Ёвон Президенти Тоҷикистон Эмомалӣ Раҳмон ба фаъолияти
корхонаи истеҳсоли варақаҳои гаҷӣ
дар ин ноҳия ҳусни оғоз бахшид.
Бино ба иттилои хадамоти матбуоти сарвари давлат, ин корхонаи истеҳсоли варақаҳои гаҷии ҶДММ “Хуаҷиан Ғаюр Индастриал” дар майдони 5,2 гектар бунёд шуда, иқтидори истеҳсолии он дар як шабонарӯз 10 ҳазор ва дар як сол дуюним миллион адад гаҷкартон мебошад.
Гуфта мешавад, дар корхона зиёда аз 200 нафар мутахассисону коргарон бо ҷойи кори доимӣ таъмин гардида, маблағи умумии сохтмони корхона беш аз 130 миллион сомонӣ (баробар ба 18 миллион доллари амрикоӣ)-ро ташкил медиҳад.
Зимнан зикр мегардад, ки қаблан сарвари давлат дар саҳни ҳавлии ин корхона барои бунёди боз ду корхона оид ба истеҳсоли рангҳои гуногун ва маводи нигоҳдорандаи гармӣ – пахташиша бо таъсиси 150 ҷойи корӣ санги асос гузошт.
Барои сохтмони ин ду корхона аз ҳисоби сармояи ҶДММ Ғаюр 150 миллион сомонӣ ҷудо гардида, иқтидори солонаи корхонаи рангҳои эмулсионӣ 15 ҳазор тонна ва коргоҳи истеҳсоли маҳсулоти гарминигоҳдорӣ 170 ҳазор метри мукааб мебошад.
