Тайи чанд рӯзи ахир бар асари боришоти аз меъёр зиёд, ки ба болоравии сатҳи об дар дарёи Элоки ноҳияи Рӯдакӣ боис гардид, беш аз 1000 манзил хисорот бардоштанд.
Бино ба маълумоти дафтари матбуоти Кумитаи ҳолатҳои фавқулодаи ҷумҳурӣ, рӯзи 12 май, тақрибан соати 03:40 дақиқа дар натиҷаи боронҳои пуршидат сатҳи оби дарёи Элок баланд гардида, дар ҷамоати деҳоти Зайнабобод, деҳаҳои Адолат, Файзоба, Садоқат, Комсомол-1 ва Комсомол-2 сел омада, тахминан ба 1146 хонаҳои истиқоматии деҳаҳои мазкур зарар расондааст. Вуруд ба ноҳияи Рӯдакӣ дар самти роҳ ба сӯйи деҳаҳои осебдида баста буда, ин қаламрав пурра аз ҷониби низомиён ва кормандони БДА иҳота карда шудааст.
Ба ҳар ҳол, ба хабарнигори «Азия-Плюс» муяссар шуд, ки ба қаламрави ноҳияи ворид гардад. Ин ҷо низомиёну наҷотдиҳандагон ва оташнишонон ҳама баҳри рафъи оқибатҳои офати табиӣ сафарбар шудаанд.
Сардори Раёсати хадамоти дохилии Сарраёсати Хадамоти оташнишонии ВКТ ҶТ генерал Нозимҷон Иброҳимзода ба «Азия-Плюс» хабар дод, ки соати 06:25-и субҳ дар бораи офати табиӣ ба навбатдори хадамоти оташнишонӣ маълумот расида, ба ин ҷо дарҳол беш аз 70 нафар кормандони хадамоти оташнишонӣ ва 10 автомашина фиристода шудааст.
Сокини деҳаи Хоҷиёни Зайналобод Бобо Хоҷаи 83-сола мегӯяд, селу лойқа пурра полези ӯро пӯшонидааст ва то ҳол (соати 15:23) касе аз кормандони ҷамоат назди онҳо наомадаанд. Ӯ афсӯс мехӯрад, ки имсол дигар аз полезаш ҳосиле ба даст оварда наметавонад.
Сокини шаҳраки Файзоба Раҳмонбердӣ Эгамбердиев низ шикоят дорад, ки то ҳанӯз ягон нафар аз кормандони ҳукумат ва ҷамоати маҳаллӣ ба макони офат ҳозир нашуда, онҳо ҳатто оби ошомиданӣ надоранд.
Як зан, сокини деҳаи Ҷалолиддини Румии ҳамин ҷамоат низ изҳор кард, ки манзилаш пурра зери обу лойқа монда, акнун зиндагӣ дар он хатарнок аст, чунки боми хона ҳар лаҳза метавонад ба замин афтад.
Нуъмонҷон Зокиров, сокини ҳамин ҷамоат зикр кард, ки якчанд гектар замине, ки дар он ӯ барои фурӯш сабзавот парвариш мекард, пурра зери об монда, акнун аз он ҳосил интизор шудан ғайриимкон мебошад.
Кумитаи ҳолатҳои фавқулода иттилоъ медиҳад, ки дар бартараф кардани оқибатҳои офтаи табиӣ дастаҳои наҷотдиҳӣ аз ҳисоби наҷотдиҳандагони
Маркази наҷотдиҳии Кумита, Ситод оид ба ҳолатҳои фавқулодда ва мудофиаи граждании шаҳри Душанбе, ҳайати шахсии қисму воҳидҳои низомии Қушӯнҳои мудофиаи граждании Кумита дар гарнизони Душанбе дар ҷойи ҳодиса фаъолият доранд.
Бино ба иттилои манбаъ, аҳолии зарардида ба макони бехавфу амн кӯчонида шуда, хушбахтона талафоти ҷонӣ ба қайд гирифта нашудааст. Дар ҳамин ҳол, сокинони маҳаллӣ аз бедарак шудани ду кӯдаки хурдсол хабар медиҳанд. Ҷустуҷӯи кӯдакон идома дорад.
Дар дигар ноҳияҳои ҷумҳурӣ
низ офатҳои табиӣ рух дода
, бар асари селфароӣ маҳаллаҳои аҳолинишини ноҳияҳои Файзобод, Ҳисор, Шаҳристон ва Панҷакент низ зарар дидаанд.
