Имрӯз Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон ва Президенти Федератсияи Россия Владимир Путин сӯҳбати телефонӣ анҷом дод.
Бино ба иттилои хадамоти матбуоти сарвари давлат, сарони ду давлат доираи масъалаҳои муносибатҳои дуҷонибаи байнидавлатӣ ва дурнамои рушду тавсеаи онҳоро дар қолаби шарикии стратегӣ мавриди гуфтугӯ қарор дода, атрофи масъалаҳои мубрами байналмилалӣ мубодилаи афкор намуданд.
Дар ин иртибот сарони ду давлати дӯст ба ҷанбаҳои алоҳидаи ҳамкориҳои минтақавӣ таваҷҷуҳ зоҳир карда, зарурати минбаъд низ ҳамоҳанг сохтани саъйю талошҳои ҷонибҳоро дар ин самт таъкид намуданд.
Гуфта мешавад, Владимир Путин Эмомалӣ Раҳмонро бо зодрӯзаш табрик намуда, ба ӯ таманниёти самимию некашро иброз дошт.
Ба иттилои манбаъ, имрӯз Эмомалӣ Раҳмон ҳамчунин бо Иҷрокунандаи вазифаи Президенти Ҷумҳурии Ӯзбекистон Шавкат Мирзиёев сӯҳбати телефонӣ анҷом дода, дар ҷараёни сӯҳбат ҷонибҳо дар фазои дӯстӣ ва ҳусни тафоҳум роҷеъ ба масъалаҳои муносибатҳои дуҷонибаи Тоҷикистону Ӯзбекистон мубодилаи афкор ва ба дурнамои рушди онҳо таваҷҷуҳ намуданд.
Зимнан аз натиҷаҳои сафари кории ба қарибӣ суратгирифтаи Вазири корҳои хориҷии Ҷумҳурии Ӯзбекистон Абдулазиз Комилов ба Тоҷикистон изҳори қаноатмандӣ карда шуд.
Зикр мегардад, ки Шавкат Мирзиёев низ Эмомалӣ Раҳмонро ба муносибати зодрӯзаш самимона табрик намуд.
Бо ин суроға аз туҳфаи президенти Русия ба Эмомалӣ Раҳмон дар як ҷашни зодрӯзи солҳои гузаштааш маълумот дарёфт карда метавонед.
