Соли ҷорӣ дар доираи омодагиҳо ба мавсими зимистон дар шаҳри Душанбе беш аз 12 километр қубурҳои гармидиҳӣ иваз карда шуданд.
Баъди анҷоми корҳои насб роҳҳои мошингард аз нав барқарор карда шуда, вале ҷойҳои кандашудаи чанде аз пиёдаравҳои шаҳри Душанбе бо хок пӯшонида шуданду халос. Баъди барфрезии аввал ва обшавии он хоки ин пиёдаравҳо ба лой табдил ёфта, гузаштан тариқи онҳо хеле душвор аст.
Чанде қабл дар мусоҳиба ба «Азия-Плюс» сардори Раёсати сохтмони асосии ҳукумати шаҳри Душанбе Нодирхон Муҳиддинов қайд карда буд, ки дар мавриди ивази қубурҳои гармидиҳӣ 10 лоиҳа амалӣ шуда, маблағи 10 лоиҳа ба сурати умум 60,1 млн. сомониро ташкил медод, вале зимни имзои қарордодҳо бо ширкатҳои гуногун ба маблағи 54,4 млн. сомонӣ қарордодҳо ба имзо расида, мутаносибан ҳудуди 5,8 млн. сомонӣ сарфа шуд.
Ин ҷо саволе ба миён меояд, ки агар комиссияи давлатӣ ин корҳоро қабул карда бошад, пас аз рӯи кадом нишондиҳандаҳову чӣ гуна сифат? Ё шояд маҳз барои дубора барқарор нашудани пиёдараҳҳо 5,8 млн. сомонӣ сарфа шудааст? Умедворем, ки мақомоти шаҳрдории пойтахт ба ин мушкилот таваҷҷуҳ зоҳир мекунанд.
