Вакилони парлумон бар ин назаранд, ки дар Пажуҳишгоҳи рушди маорифи Вазорати маориф ва илми Тоҷикистон дар мавриди пешниҳоди аз 1 сентябр ба 1 август гузаронидани оғози соли нави хониш ба шитобкорӣ роҳ додаанд. Онҳо чунин мешуморанд, ки дар ин ҳолат тамоми низоми маорифи кишвар вайрон мешавад.
«Пешниҳоде бархе аз мутахаасисони соҳаи маориф дар бораи зарурати аз 1 август оғоз кардани соли хониш баҳснок аст ва ба қабули он шитоб кардан лозим нест», – изҳор дошт номзади илмҳои педагогӣ, узви Кумитаи илму маориф, фарҳанг ва сиёсати ҷавонон Нурулло Оқилов.
Ба гуфтаи ӯ, агар ин пешниҳод пазируфта шавад, пас лозим меояд, ки тамоми низоми маорифи Тоҷикистон, аз ҷумла фаъолияти муассисаҳои томактабӣ, коллеҷу техникумҳо ва мактабҳои олиро тағйир додан лозим меояд, зеро ҳамаи онҳо ба оғози соли хониш аз 1 сентябр мутобиқ карда шудаанд.
Ғайр аз ин вакил бар ин назар аст, ки кори низоми маорифи Тоҷикистон бо низомҳои маорифи кишварҳои узви ИДМ, пеш аз ҳама кишварҳои минтақаи Осиёи Марказӣ ва Русия ҳамоҳанг карда шудааст.
«Агар мо соли хонишро аз 1 август оғоз кунем, ин тавозун аз байн меравад», – мегӯяд вакили парлумон.
Оқилов ҳамчунин аз омӯзгороне ҳимоят кард, ки ба андешаи Вазорати маориф, бо кӯдакон кор накарда, моҳи август маош мегиранд.
«Ҳамаи омӯзгорони Тоҷикистон маҳз моҳи август ба омодагӣ ба соли хониш шурӯъ мекунанд, вале ин маънои онро надорад, ки онҳо бидуни иҷрои коре маош мегиранд, – иброз дошт номбурда. – Ба дигар вақт гузаронидани оғози соли хониш барои муаллимон натанҳо мушкили равонӣ, балки молиявиро ҳам пеш меорад».
Ӯ хотиррасон намуд, ки муҳлати рухсатии омӯзгорон – на камтар аз 45 рӯз – мутобиқи қонунгузорӣ муқаррар шуда, агар ҳозир соли хониш аз 1 август оғоз гардад, тамоми низом вайрон мешавад, аз ҷумла дар сатҳи қонунҳои қабулшуда.
Вакили палатаи поёнии парлумон, раиси Ҳизби сотсиалистии Тоҷикистон, номзади илмҳои педагогӣ Абдуҳалим Ғаффоров низ қотеъона мухолифи ин ташаббуси Пажуҳишгоҳи рушди маориф аст.
«Қарори оғози соли хониш аз 1 сентябр бо назардошти таҳқиқоти олимони маъруфи равоншинос, омӯзгорон, физиологҳо ва табибони аксари кишварҳои ҷаҳон қабул шуда, мо дар як лаҳза ҳамаи инро барбод доданием», – гуфт Ғаффоров.
