Ширкати миллии ҳавопаймоии «Тоҷик Эйр» изҳороти Ширкати давлатии суғуртаи «Тоҷиксуғурта» доир ба суғурта (бима) надоштани муософирони ширкатро рад мекунад.
Ин ҷо сари масъалаи ихтилофҳо миёни ширкатҳои давлатии «Тоҷик Эйр» ва «Тоҷиксуғурта» сухан меравад. «Тоҷиксуғурта» изҳор медорад, ки ширкати ҳавопаймоӣ аз имзои шарномаи суғурта саркашӣ намуда, исрор меварзад, ки мусофирон бояд огоҳ бошанд, ки ҳаёташон суғурта нашудааст.
Аз ширкати ҳавопаймоии «Тоҷик Эйр» дар ин робита иттилоъ доданд, ки онҳо дар ширкати хусусӣ суғурта доранд, ки ҷавобгӯи меъёрҳои байнулмилалӣ аст.
«Фаъолияти «Тоҷиксуғурта» ба меъёрҳои байнулмилалӣ ҷавобгӯ нест, – гуфт дар ин робита директори молиявии «Тоҷик Эйр» Акбар Шарипов. – Мо чандин маротиба бобати имзои шартнома дар бораи суғуртаи мусофирон дар асоси меъёрҳои байнулмилалии қабулшуда ба онҳо муроҷиат намуда, бори охир ин кор охири соли 2015 сурат гирифта буд, вале аз ширкати суғуртавии мазкур ҳеҷ гуна посухи мусбат нарасид».
Ба гуфтаи Шарипов, моҳи сентябри соли 2016 «Тоҷик Эйр» бо ширкати суғуртавии «Лидер Иншуренс» мутобиқи талаботи байнулмилалӣ шартнома баста, мувофиқи он, ҳар як ҳавопаймои ширкат полиси суғуртавӣ дорад ё ба истилоҳи дигар, нақлиёти ҳавоии ширкат, мусофирон ва шахсоне сеюм суғурта шудаанд.
Барои тасдиқи суғурта шудани мусофирон ширкати ҳавопаймоӣ нусхаи полисро пешниҳод кард.
«Маблағи суғуртаи ҳар як мусофири мо 250 ҳазор франки швейтсарӣ (каме бештар аз 250 ҳазор доллар)-ро ташкил дода, дар ҳамин ҳол, «Тоҷиксуғурта» ҳар як мусофирро ба ҳадди ниҳоӣ 15 ҳазор доллар суғурта карда метавонад», – таъкид дошт намояндаи «Тоҷик Эйр».
Қобили зикр аст, ки зимни нишасти хабарии аввали ҳафта директори генералии «Тоҷиксуғурта» Аловиддин Сатторӣ изҳор намуд, ки «Тоҷик Эйр» бо ҳар роҳу восита аз имзои шартномаи суғурта бо ширкати давлатӣ саркашӣ карда, маблағи суғуртаи ҳатмиро пардохт намекунад.
«Айни замон ҳаҷми қарзи ширкати ҳавопаймоӣ аз рӯи суғуртаи ҳатмӣ назди ширкати мо беш аз 25 млн. сомониро ташкил медиҳад ва мусофироне, ки тариқи ҳавопаймоҳои «Тоҷик Эйр» сафар мекунанд, бояд донанд, ки онҳо суғурта надоранд», – таъкид дошта буд роҳбари «Тоҷиксуғурта».
