Ҳукумати Русия давоми солҳои 2017-2019 аз ҳисоби буҷети федералӣ барои рушди низоми устувори ғизои мактабӣ дар Тоҷикистон то 6,6 млн. доллар маблағ ҷудо мекунад.
Бино ба иттилои хабаргузории РИА Новости, тибқи ин қарор, ҷудо шудани то 5,1 млн. доллар ба Барномаи ҷаҳонии ғизои СММ ҷиҳати маблағгузории хароҷоти марбут ба амалисозии марҳилаи дуюми лоиҳа оид ба рушди низоми устувори ғизои мактабӣ дар Тоҷикистон, аз ҷумла соли 2017 – то 1,1 млн., соли 2018 – то 2 млн. ва соли 2019 – ҳамчунин то 2 млн. доллар пешбинӣ шудааст.
Ғайр аз ин, то 1,5 млн. доллар ба Фонди байнулмилалии рушди кишоварзӣ барои маблағгузории хароҷоти марбут ба амалисозии лоиҳаҳо оид ба дастгирии фермерон дар доираи ин лоиҳа ҷудо шуда, аз ин миқдор соли 2017 ҷудо шудани то 700 ҳазор ва соли 2018 – то 800 ҳазор доллар ба нақша гирифта шудааст.
Вазорати молияи Русия дар ҳамдастӣ бо Вазорати корҳои хориҷии ин кишвар бояд тартиби гузаронидани маблағ ва истифодаи воситаҳои ҷудошударо бо Барномаи ҷаҳонии ғизои СММ мувофиқа созанд.
