Яке аз пешвоёни ҳаракати тундгарои «Толибон», муовини волии пасипардагии толибон дар Қундузи Афғонистон ва 14 ҷангии ҳаракат дар ҷараёни амалиёти махсус дар минтақаи шимолу шарқии Афғонистон кушта шуданд.
Хабаргузории Интерфакс бо истинод ба Пажвок дар ин робита иттилоъ медиҳад, ки сухангӯи Вазорати мудофиаи Афғониситон Давлат Вазирӣ гуфтааст, аз 14 нафар ҷангиёни кушташуда 8 нафарашон шаҳрвандони Тоҷикистон мебошанд.
Бино ба маълумоти Афганистан.ру, дар музофоти Кундуз бар асари ҳамлаи ҳавоӣ тибқи маълумоти гуногун аз 13 то 24 нафар ҷангии ҳаракати Толибон кушта шуда, амалиёти воҳидҳои артиши милии Афғонистон дар вулусволии Дашти Арчии ҳамммарз бо Тоҷикистон сурат гирифтааст ва гурӯҳи ҷангиён дар қаламрави деҳаи Мулоқулӣ маҳв шудаанд.
Гуфта мешавад, миёни кушташудагон фармондеҳони воломақоми толибон, аз ҷумла муовини пасипардагии волии музофот, маъруф бо номи мулло Асадулло ҳузур дорад. Хабаргузории Пажвок иттилоъ медиҳад, ки дар ҷараёни ҳамлаи ҳавоӣ якчанд нафар ҷангиёни хориҷӣ низ кушта шудаанд.
