Дар вилояти Перми Русия оид ба парвандаи пурсарусадои қатли мудири тиҷоратӣ (топ-менеҷер)-и корхонаи бахши мудофиаи Русия – ҶП «Кирас» Юрий Чубаев ҳукм содир шуд.
Нашрияи «Коммерсант» дар ин робита менависад, мақомоти тафтишоту суд муайян кардаанд, ки ба ин ҷиноят бо мақсади тамаъҷӯӣ се нафар шаҳрвандони Тоҷикистон – Юсуф ва Зоҳир Умаровҳо ва Саид Қаландарзода даст зада, онҳо ба муҳлатҳои аз 18 то 21 соли зиндони низомаш шадид маҳкум шудаанд.
Ёдрас мекунем, ки моҳи апрели соли гузашта ҷасади Чубаев дар шаҳраки Троитск, дар манзилгоҳаш дарёфт шуд. Дар ҷасад аломатҳои зиёди осори зарби корд ошкор гардида, аз хона 350 ҳазор рубл ва дигар чизҳои арзишманд дуздида шуда буданд.
Гуфта мешавад, ба Юсуф Умаров – 21 сол, Саид Қаландарзода – 19 сол ва Зоҳир Умаров – 18 соли маҳрумият аз озодӣ ҷазо таъин шуда, ғайр аз ин, ҳар кадоме аз маҳкумшудагон ба пардохти 4 млн. рубл ҷубронпулии маънавӣ ба духтари ҳалокшуда, маблағи пулҳои дуздидашуда ва арзиши хизматгузориҳои адвокатҳо уҳдадор шудаанд.
