Ҳомии ҳуқуқи маъруфи тоҷик Файзинисо Воҳидова ният дорад, ки аз болои нерӯҳои марзбонии ҷумҳурӣ, ки сафари ӯро ба Қирғизистон манъ карданд, ба суд шикоят барад.
Дар мусоҳиба ба «Азия-Плюс» Воҳидова дар ин робита хабар дод, ки рӯзи 14 май ӯ барои иштирок дар маросими гӯру чӯби ҷиянаш ба Қирғизистон азми сафар дошт, вале ҳангоми убур аз гузаргоҳи Овчӣ-Қалъача марзбонони тоҷик ӯро манъ кардаанд ва ин манъкунӣ 8 соат – аз соати 7-и субҳ то соати 15:00-и рӯз идома доштааст.
«Ба ман гуфтанд, ки барои тарки қаламрави Тоҷикистон ҳуқуқ надорам, – мегӯяд ҳомии ҳуқуқ. – Сабаби боздоштро мушкилот дар шиносномаам унвон карданд, аммо марзбонон ҳатто шиносномаи маро надидаанд, вале ба ман гуфтанд, ки он нуқс дорад, гӯё муҳр ноаён будааст. Шиносномаи ман нав аст. Онро соли гузашта дар ВКД гирифтам ва муҳр дар он ба хубӣ аён аст».
Файзинисо Воҳидова мутмаин аст, ки мушкилот бо шиноснома баҳонаест барои роҳ надодан ба тарки Тоҷикистон кардани ӯ.
«Боздошт муддати 8 соат давом кард ва ин амали марзбонон ғайриқонунӣ мебошад. Ҳозир ман барои шикоят ба суд маводи ҷамъ мекунам. Барои иҷозаи вуруд ё хурӯҷ хадамоти муҳоҷират ҳуқуқ дорад, аммо вақте ман ба хадамоти муҳоҷирарт рафтам, онҳо умуман лар бораи ин манъкунӣ огаҳӣ надоштаанд», – зикр кард номбурда.
