Эмомалӣ Раҳмон, раиси ҷумҳури Тоҷикистон ба духтараш Озода Раҳмон, ки ҳоло раиси дастгоҳи иҷроияи президент аст, унвони мушовири давлатии адлия додааст.
Бино ба иттилои Радиои Озодӣ, ин унвон мартабаи баланд дар низоми додгустарӣ ба ҳисоб меравад. Қарор дар ин заминаро Эмомалӣ Раҳмон рӯзи 25-уми майи имсол ба имзо расондааст.
Гуфта мешавад, Озода Раҳмон, ки соли 2016 раиси дастгоҳи иҷроияи президент таъйин шуд, расо 5 сол пеш аз гирифтани ин унвон, 25-уми майи соли 2012 диссертатсияи номзадиаш дар мавзӯи “Инкишофи қонунгузорӣ дар бораи ҳуқуқ ва озодиҳои зан дар Тоҷикистон”-ро ҳимоят кард ва номзади илми ҳуқуқшиносиро гирифт.
Духтари 38-солаи раиси ҷумҳур, ки Донишгоҳи миллии Тоҷикистонро хатм кардааст, ба ғайр аз мартабаи мушовири давлатии адлия, рутбаи дипломатии сафири фавқулода ва мухторро дорад, чун дар сафорати Тоҷикистон дар Амрико, дар вазорати умури хориҷӣ кор кардааст ва муовини вазир ҳам буд.
