Ду гурӯҳи авиатсияи оперативӣ-тактикии Русия ҷиҳати иштирок дар чорабиниҳои муштараки омодагии ҷангии воҳидҳои ҳарду артиш ба Тоҷикистон интиқол дода шуданд.
Бино ба маълумоти хадамоти матбуоти Ҳавзаи марказии ҳарбии Вазорати мудофиаи Русия, дар ин чорабиниҳо воҳидҳои артиши Тоҷикистону Русия вазифаҳои таълимиву ҷангӣ дар вазъи ягонаи оперативиро мувофиқи нақшаи умумӣ мавриди омӯзишу ба иҷро мерасонанд.
Гуфта мешавад, чор ҳавопаймои қиркунандаи Су-25 СМ аз пойгоҳи авиатсионии Кант дар Қирғизистон ва ҳамин миқдор ҳавопаймоҳои бомбандози Су-24 М аз пойгоҳи авиатсионии Шагол дар Урали Ҷанубӣ мунтақил шудаанд.
Тибқи фарзияи машқҳо ҳавопаймоҳо ба мавқеъҳои ҷангии гурӯҳҳои шартии ҷинояткорон дар машқгоҳи Ҳарбмайдон дар наздикии марзи Тоҷикистону Афғонистон зарба зада, дар макони амалиёт нуқтаи ёрирасони идораи ситоди Ҳавзаи марказии ҳарбӣ ташкил карда мешавад, ки ҳамроҳ бо гурӯҳи оперативии Ситоди кулли Қувваҳои Мусаллаҳи Тоҷикистон амал мекунад.
Зимнан зикр мегардад, ки машқҳои мазкур дар маҷмӯъ як моҳ идома меёбанд.
