Директори Агентии назорати маводи нашъаовари назди президенти Тоҷикистон генерал-лейтенанти адлия Шерхон Салимзода рӯзи 19 июл дар Душанбе бо прокурори генералии Беларус Александр Конюк дидору гуфтушунид кард.
Тавре ба «Азия-Плюс» сардори маркази матбуоти Агентӣ полковник Хушнуд Раҳматуллоев хабар дод, зимни мулоқот роҳбари Агентӣ ба ҳамсуҳбаташ доир ба вазъ атрофи маводи нашъаовар, роҳу воситаҳои асосии қочоқи он аз Афғонистон ба Тоҷикистон ва минбаъд ба кишварҳои ИДМ, ҷиноятҳои марбут ба гардиши ғайриқонунии маводи нашъаовар дар муқоиса бо кишварҳои минтақаи Осиёи Марказӣ маълумот дод.
Зимни мулоқот Салимзода таъкид доштааст, ки дар доираи ҳамкориҳои байнулмилалӣ бо СҲШ, СААД ва дигар созмонҳо дар самти мубориза бо нашъамандӣ ва қочоқу муомилоти ғайриқонунии он ташаббусҳои гуногуни дуҷониба ва бисёрҷониба роҳандозӣ шудааст.
Прокурори генералии Беларус пешниҳод кардааст, ки соли оянда дар Минск доир ба мушкилоти гардиши ғайриқонунии маводи мухаддир бо иштироки роҳбарони мақомоти мубориза бо маводи нашъаовари кишварҳои узви ИДМ конфронси байнулмилалӣ гузаронида шавад.
