Вазорати корҳои дохилии Русия санадеро таҳия намуд, ки дар он манъи ҷалби хориҷиён ба кор бидуни имзои шартномаи меҳнатӣ пешбинӣ шудааст.
Хабаргузории РБК менависад, ВКД лоиҳаи тағйиру иловаҳо ба Кодекс дар бораи ҳуқуқвайронкунии маъмуриро омода намуда, ба он илова кардани меъёрҳои манъкунандаи ҷалби хориҷиёни ба Русия воридшударо ба кор бидуни имзои шартномаи меҳнатӣ бо онҳо ё шартномаи шаҳрвандӣ-ҳуқуқӣ барои иҷрои кор пешниҳод кардааст.
Мувофиқи лоиҳаи санад, барои риоя нашудани ин меъёр ба шахсони воқеӣ – то 5 ҳазор рубл ва мансабдорон – то 50 ҳазор рубл ҷарима пешбинӣ шуда, ширкатҳо метавонанд натанҳо то 800 ҳазор рубл ҷарима шаванд, балки корашон ба муҳлати то 3 моҳ боздошта шавад.
Ба шахсони хориҷиён ё нафарони бешаҳрвандиро ба кор ҷалбкарда, ки замони вурудашон ба Русия ба кор омаданашонро зикр накардаанд, низ ба ҳамин монанд ҷазо пешбинӣ шудааст.
Тағйир ба моддаи дигар ҷорӣ шудани ҷарима (то 5 ҳазор рубл) барои худи хориҷиёнро дар назар дорад, ки бидуни имзои шартномаи меҳнатӣ ё қарордоди паймонкорӣ ба кор машғул мешаванд. Ҷазои иловагӣ барои қонуншиканони ин меъёр метавонад хориҷкунии маъмурӣ аз қаламрави Русия шавад.
Зарурати қабули қонуни навро дар ВКД ба талаботи такмили назорат аз болои иҷрои муқаррароти Шартнома дар бораи Иттиҳоди иқтисодии АвруОсиё (ИИАО) нисбат медиҳанд. Айни замон барои шаҳрвандони кишварҳои узви ИИАО (Арманистон, Беларус, Қазоқистон, Қирғизистон) барои кор дар Русия иҷозатномаи махсус лозим нест, вале барои ҳузури тӯлонӣ дар кишвар ба ҳар ҳол мавҷуд будани шартномаи меҳнатӣ зарур дониста мешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
