Кумита оид ба корҳои дин, танзими анъана ва ҷашну маросимҳои назди ҳукумати Тоҷикистон изҳор медорад, ки намояндагони комиссияҳои ҷамъиятӣ ба гирифтани ғизо аз дастурхони маъракаҳои ҷашну маросим ҳуқуқ надоранд.
Сухангӯи Кумита Афшин Муқимов дар ин робита қайд кард, ки аъзои комиссияҳои ҷамъиятӣ танҳо метавонанд ҷиҳати пешгирии исрофкории беҳуда дар маъракаҳои тӯй ва азодорӣ, ҳамчунин дигар маросимҳо бо мардум суҳбатҳо гузаронида, зараровар будани онро шарҳ диҳанд.
Чанде пеш васоити ахбори умум хабар доданд, ки мақомоти шаҳри Кӯлоб кӯлчаву ҳалвои ба муносибати арӯсӣ омодашуда дар хонаи сокини ҷамоати Даҳана Зайдулло Худоёровро мусодира карда, ба як бемористони рӯҳӣ ҳадя намудааст.
Мақомот гуфтаанд, ки таҳияву тақдими ширинӣ дар маросими омодагиҳо ба арӯсӣ хилоф бо муқаррароти қонуни танзими анъана ва ҷашну маросим аст. Ҳарчанд нисбат ба хонаводаи арӯс санад тартиб дода шуд, ба хотири дар марҳилаи пеш аз вайрон шудани қонун содир шудани он, ин хонаводаро ҷарима набастаанд.
Ба гуфтаи сухангӯи Кумита, ин оила муқаррароти моддаи 10, қисми 2-и қонуни танзимро риоя накардааст, ки дар он баргузории маросимҳои ноншиканон, модарталабон, падарталбон, чодарканон, муборакбодӣ, роҳбандон манъ карда мешавад.
«Оилаи Зайдулло Худоёров барои зиёфат дар хонаи домод кулчаҳои махсус ва ҳалво пухтааст, ки ин нақзи қонун аст, – иброз дошт ӯ. – Вале дар ҳамин ҳолат ҳам ҳеҷ касе ба мусодираи ғизо ҳақ надорад ва ин амал сурат ҳам нагирифтааст».
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
