Сафорати ИМА дар шаҳри Анқара эълом кард, ки додани ҳама гуна навъи раводид (виза)-ро ба шаҳрвандони Туркия, ба ҷуз аз визаи муҳоҷират қатъ намуд. Сафорати Туркия дар шаҳри Вашингтон низ баъди чанд соат изҳороти ҳамсонеро нашр кард.
Бино ба иттилои сомонаи Бахши хабарии Осиёи Марказӣ, тасмими ИМА дар посух ба боздошти корманди консулгарии Амрико дар шаҳри Истамбул гирифта шуд. Сафорат мегӯяд, то замоне, ки ҷониби Туркия амнияти ҳайати дипломатии Амрикоро монанди пешин кафолат надиҳад, ба ягон шаҳрванди ин кишвар раводид дода нахоҳад шуд.
Муносибатҳои ИМА ва Туркия баъди ҷонибдории Вашингтон аз курдҳои Сурия – ҳампаймонони Ҳизби коргарони Курдистон сард шудаанд, ки Анқара онро созмони террористӣ эълом кардааст.
Фазои дипломатии ду кишвар низ баъди он бад шуд, ки Анқара – узви НАТО низоми мушакии Русияро харид ва талошҳояш барои истирдоди мухолифи турк Фатҳуллоҳ Гюлен аз ИМА натиҷае надоданд. Анқара Гюленро дар ташкили табаддулоти нокоми моҳи июли соли 2016 дар Туркия айбдор мекунад.
Дипломати амрикоӣ, ки ҳафтаи гузашта дар Истамбул боздошт шуд, ба ҷосусӣ ва робитаи пинҳонӣ бо Гюлен айбдор мешавад. Департаменти давлатии ИМА айби эъломнамудаи ҷониби Туркияро “исботнашуда” номид.
