Вазири фарҳанги Тоҷикистон Шамсиддин Орумбекзода бо сафири Фаронса дар Тоҷикистон хонум Ясмин Гуедар дидору гуфтушунид кард.
Бино ба иттилои дафтари матбуоти Вазорати фарҳанги ҷумҳурӣ, зимни вохӯрӣ ҷонибҳо оид ба таҳкими робитаҳои фарҳангии байни Тоҷикистон ва Фаронса, хусусан оид ба намоиши нигораҳои таърихии Тоҷикистон дар Осорхонаи Гимеи Париж, ки соли 2019 баргузор мегардад, суҳбат карданд.
Сафири Фаронса изҳор дошт, ки ман бовар дорам, намоишгоҳи Тоҷикистон дар Париж дар сатҳи олӣ баргузор гашта, аз ҷониби мардуми Фаронса хеле хуш пазируфта хоҳад шуд.
Хонум Ясмин Гуедар изҳор дошт, ки барои самаранок ба роҳ мондани ҳамкории дуҷонибаи судманд дар доираи салоҳияти кориаш талош хоҳад кард.
– Намоиши мазкур имконияти хубест барои муаррифии фарҳанги Тоҷикистон ва он барои таҳким ва рушди муносибатҳои фарҳангии ду кишвар такони тоза хоҳад бахшид, – қайд намуд Шамсиддин Орумбекзода.
