Санаи 11 феврал ҳавопаймои Ан-148-и ширкати «Саратовские авиалинии», ки бо хатсайри Маскав – Орск парвоз мекард, ба садама дучор шуд.
Нашрияи «Новая газета» менависад, ҳавопаймо нимаи дуюми рӯз аз фурудгоҳи Домодедово парвоз карда, баъди чанд дақиқа робита бо он қатъ ва аломати он аз радарҳо гум мешавад.
Пораҳои ҳавопаймо дар ноҳияи Раменскоеи вилояти Маскав дарёфт мегардад. Шоҳидон нақл кардаанд, ки дар вақти садама таркиши баландеро шунидаанд. Баъзе гуфтаанд, ҳавопаймо ҳанӯз дар ҳаво оташ гирифта буд.
Айни замон беш аз 20 дастаҳои наҷотдиҳандагон ба маҳалли ҳодиса сафарбар шудаанд, ки шабонарӯзӣ кор мекунанд. Дар ҳавопаймо 65 нафар мусофирон, аз ҷумла 3 нафар кӯдакон ва 6 нафар ҳайати сарнишинони ҳавопаймо қарор доштанд, ки ҳамаашон ба ҳалокат расиданд.
Вазири нақлиёти Русия Максим Соколов изҳор доштааст, ки шахсияти фавтидагон бо ёрии ташхиси генетикӣ муайян карда мешавад. Дар фурудгоҳи шаҳри Орск таҳти роҳбарии губернатори вилояти Оренбург ситоди фаврӣ амал мекунад. Ин ҷо пайвандону наздикони фавтидагонро қабул мекунанд. Мардум ба фурудгоҳ гул меоранд.
Баъди ин ҳодисаи фоҷеабор нахуствазири Русия Дмитрий Медведев ба таъсиси комиссияи рафъи оқибатҳои садама дастур дод, ки раҳбарии он ба дӯши вазири нақлиёт Максим Соколов вогузор шуд. Қарор қабул шудааст, ки ба оилаҳои фавтидагон дар ҳаҷми 2 млн. рубл ҷубронпулӣ пардохт мешавад.
