Нимаи дуюми рӯзи 19 март бо иштироки Президенти Тоҷикистон Эмомалӣ Раҳмон ва Раиси шаҳри Душанбе Рустами Эмомалӣ ноҳияи Исмоили Сомонии шаҳри Душанбе дар ҳудуди Донишгоҳи аграрӣ майдони варзишии «Душанбе Арена» мавриди истифода қарор гирифт.
Бино ба иттилои хадамоти матбуоти сарвари давлат, майдони варзишии «Душанбе Арена» бо паҳноии 45 ва дарозии 90 метр тибқи меъёрҳои Федератсияи байналмилалии футбол бо 1000 ҷойи нишаст бунёд гардидааст. Дар ин майдон барои гузаронидани мусобиқаҳои футбол ва машқу тамрин шароити мусоиду арзанда фароҳам аст.
Ҳамчунин дар ноҳияи Исмоили Сомонӣ бо иштироки Сарвари давлат ва раиси пойтахт иншооти фароғатии "Дунёи афсона" барои кӯдакон ба истифода дода шуд.
“Дунёи афсона” дар ҳудуди Муассисаи давлатии "Боғи фарҳангу фароғатии ба номи Садриддин Айнӣ" сохта шудааст ва он дорои 11 намуд майдончаву таҷҳизоти дилхушӣ мебошад. Дастгоҳҳо асосан барои кӯдакони синни то 12 сола пешбинӣ шудааст.
Дар рӯзи ифтитоҳи “Дунёи афсона” яке аз аввалинҳо шуда, 20 нафар кӯдакон, ки бо иқдомҳои инсондӯстонаи Сарвари давлат ба таври ройгон ҷарроҳии нуқсонҳои модарзодии дил гузарониданд, ба истироҳат фаро гирифта шуданд. Пас аз гузарондани амалиёти ҷарроҳӣ ин кӯдакон комилан саломату бардам гардида, имкон пайдо карданд, ки ба мисли дигар ҳамсолони худ ба бозиҳои серҳаракат машғул шаванд. Кӯдакон аз шаҳру ноҳияҳои Вилояти Мухтори Куҳистон Бадахшон, Суғду Хатлон ва дигар минтақаҳои ҷумҳурӣ мебошанд.
Дар идома Президенти Тоҷикистон Эмомалӣ Раҳмон барои бунёди Корхонаи истеҳсоли обҳои ташнашикани «Сиёма» дар шаҳри Душанбе санги асос гузошт.
Иншооти мазкур бо маблағи умумии 15 миллион доллари ИМА бунёд карда хоҳад шуд. Инчунин дар корҳои сохтмонии ин корхонаи истеҳсолӣ, ки наздик ба ду сол идома меёбад, 150 нафар коргарони маҳаллӣ ҷалб гардида, дар ин баробар бо мавриди истифода қарор гирифтани он 50 нафар шаҳрвандони кишвар бо ҷои кори доимӣ ва маоши хуб таъмин хоҳанд шуд.
Сипас Эмомалӣ Раҳмон бо Раиси шаҳри Душанбе Рустами Эмомалӣ дар вазъияти тантанавӣ Боғи фарҳангӣ-фароғатии "Ҷавонон"-ро мавриди баҳрабардорӣ қарор дода, дар маросими ифтитоҳи он шумораи зиёди соҳибкорони пойтахт, фаъолон ва аҳли зиёи кишвар иштирок карданд.
Дар доираи корҳои таҷдид дар боғ бинову иншооти зиёд, аз ҷумла бинои маъмурӣ, "Картодром", қаҳвахонаҳои "Азия", "Австралия", обанборҳо ва айвону нишастгоҳҳо, фаввораҳои бо чароғҳои ранга муҷаҳҳаз ва дигар иншооти ёрирасони замонавӣ бунёд шуда, хатҳои обтаъминкунӣ, шабчароғҳо ва ноқилҳои барқӣ пурра таъмир гардидааст.
Бо иштироки Сарвари давлат ва раиси пойтахт ҳамчунин дар назди Муассисаи давлатии Наврӯзгоҳи пойтахт пули роҳи оҳан мавриди баҳрабардорӣ қарор гирифт, ки иншооти мазкур бо гузашти солҳо фарсуда шуда, ба таъмир ниёз пайдо карда буд.
Дар доираи навсозии пули мазкур дар баробари таъмиру тармими хати роҳи оҳан, болои пул бо панҷараҳои мунаққаши оҳанӣ оро дода шуда, аломатҳои ороишии онро таҷҳизоти равшандиҳанда зиннати иловагӣ мебахшанд.
Корҳои сохтмонӣ дар қисмати поёнии пул низ бо истифода аз масолеҳи хушсифати ороишии муосир бо сифати баланд анҷом дода шудааст. Дар доираи таъмири пули мазкур гирду атрофи он низ таъмир гардида, ниҳолҳои ороишию сояафкан ва гулу буттаҳои мавсимӣ шинонида шудааст.
