Вазорати тандурустӣ ва ҳифзи иҷтимоии аҳолии Тоҷикистон изҳор мекунад, ки 27 нафар хонандагони мактаби деҳаи Чаргии ноҳияи Муъминобод аз изтироби хеле сахт (ҳолати шок) беҳуш шудаанд.
Гурӯҳи корие, ки барои муайян кардани сабабҳои беҳушшавии оммавии 27 нафар хонандагони мактаб ба Муъминобод фиристода шуда буд, ба чунин хулоса расидааст.
Як манбаъ аз Вазорати тандурустӣ хабар дод, ки 2 нафар хонандагон бемории саръ (эпилепсия) доштаанд.
«Аввал вазъи хонандаи синфи 5-ум Парвизи Хусрав бад мешавад, ки баъдан дар ӯ бемории эпилепсияро ошкор мекунанд: ӯ беҳуш шуда, бемориаш шиддат мегирад. Баъдан ҳолати ноболиғи дуюм бад шуда, дар ӯ ҳам эпилепсияро ошкор мекунанд. Аз изтироби ниҳоят зиёд бар асари тарсу ҳарос вазъи хонандагони боқимонда ҳам бад шудааст», – хабар дод манбаъ.
Ҳамаи ноболиғон ба бемористони ноҳия фиристода шуда, вақте ки комиссия ба Муъминобод меояд, аллакай ягон хонанда дар он ҷо бистарӣ набудааст. «Вақте комиссия омад, ҳамаи хонандагон аллакай дар дарсҳо буданд. Ба саломатии онҳо ҳеҷ хатаре таҳдид намекунад», – илова карда манбаъ.
Ёдрас мекунем, ки Радиои Озодӣ санаи 6 апрел дар бораи беҳушшавии 27 хонандаи ин мактаб – толибилмони синфи 5 ва 7-ум хабар дод. Аз қавли Зоҳиршоҳ Ишратов, як масъули сарраёсати Идораи вогиршиносии Вазорати тандурустӣ ва ҳифзи иҷтимоии Тоҷикистон зикр гардид, ки ташхиси фаврии хуни кӯдакон нишон додааст, ки онҳо аз кадом ғизо ё маводи кимиёӣ заҳролуд нашудаанд.
