Дар Бағдод суд чор зани тоҷикро барои узвият дар гурӯҳи террористии «Давлати исломӣ» ба ҳабси абад махқум кард. Дар ин бора чанде қабл як қатор ВАО-и хориҷӣ иттилоъ доданд.
Ному насаби занон, ҷузъиёти масъала, зодаи кадом минтақаҳои Тоҷикистон будани ин занон ва кай ба Ироқ рафтанашон маълум нест.
Бино ба маълумоти хабаргузории Франс-Пресс, дар суди шаҳри Бағдод барои робита доштан бо гурӯҳи «Давлати исломӣ» 19 зан русиягӣ ва 6 зани озарбойҷонӣ ба ҳабси абад маҳкум шуданд. Дар ин гузориш гуфта мешавад, занони ҳиҷобпӯшро як нафарӣ ба толори суд даъват намуда, аксари онҳо дар дасташон кӯдакони хурдсол доштанд.
Дар ҳамин ҳол, сардори департаменти иттилооти Вазорати корҳои хориҷии Тоҷикистон Вафо Ниятбеков ба «Азия-Плюс» дар ин робита иттилоъ дод, ки алҳол дар бораи занони маҳкумшудаи тоҷик дар Ироқ Тоҷикистон маълумот дар даст надорад.
Ӯ қайд кард, ки ба ҷониби Ироқ дар ин хусус дархости расмӣ ирсол шуда, ояндаи наздик дар ин бораи ин занҳо ба Тоҷикистон маълумоти муфассал пешниҳод мешавад.
Соли 2015 Вазорати корҳои дохилии Тоҷикистон маълумот дода буд, ки 154 оилаи тоҷикон ба Ироқу Сурия рафтанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
