Дар маҳаллаи Испечаки шаҳри Душанбе, рӯ ба рӯи масҷиди Ҳамадонӣ нахустин супермаркети «Би1» боз шуд.
Ояндаи наздик дар дигар маҳаллаҳои пойтахт ва ҷумҳурӣ низ шабакаҳои супермаркетҳои «Би1» (тарҷумааш аз фаросавӣ Bien – «хуб»), ки шабакаи иловагии гипермаркети Ашан мебошад, ифтитоҳ мегардад.
Дар маросими ифтитоҳи супермаркет сафири Фаронса дар Тоҷикистон Ясмин Гуедар ва директори генералии ширкати «Шивер Тоҷикистон» Ален Бартез ҳузур доштанд.
«Сафорат ширкати «Шивер Тоҷикистонро дастгирӣ хоҳад кард, – иброз дошт сафир. – Иқдоми ширкат ба рушди иқтисоди ҷумҳурӣ, аз ҷумла бахши хусусӣ мусоидат мекунад, ки ҳатман сармоягузорон ва тоҷирони навро ба Тоҷикистон ҷалб мекунад».
Сафир сарпарастии шахсии директори супермаркети «Би1»-ро ваъда кард, зеро ба ақидаи ӯ, Нигина Дӯстмуҳаммад барои занони дигари тоҷик, ки барои ишғоли мансабҳои роҳбарӣ дар ташкилоту корхонаҳои Тоҷикистон талош меварзанд, намунаи ибрат хоҳад шуд.
Дар супермаркети «Би1» беш аз 5 ҳазор номгӯи молу маҳсулоти ниёзи аввалия пешниҳод мешаванд, ки ҳам аз истеҳсолкунандагони маҳаллӣ ва ҳам аз молу маҳсулоти воридотии «Ашан» аз Русия харидорӣ мешаванд.
Ёдрас мекунем, ки се сол пеш ширкати «Шивер Тоҷикистон» нахустин гипермаркети «Ашан»-ро дар Тоҷикистон боз намуда, акнун мавқеи худро дар ҷумҳурӣ ҳамчун сармоягузори муваффақи байнулмилалӣ мустаҳкам мекунад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
