Тоҷикистону Словакия ният доранд, ки асос қарордодиву ҳуқуқии муноисбатҳои дуҷонибаро мустаҳкам созанд. Ҷонибҳо ба таҳия ва имзои созишномаҳои ҳамкорӣ дар самтҳои гуногун манфиатдоранд.
Бино ба иттилои дафтари матбуоти палатаи поёнии парлумони ҷумҳурӣ, дар мулоқоти имрӯзаи муовини якуми Раиси Маҷлиси намояндагони Маҷлиси Олии ҶТ Абдуҷаббор Азизӣ бо сафири Ҷумҳурии Словакия дар Тоҷикистон Ян Бори масъалаҳои таҳкими робитаҳои байни давлатҳо баррасӣ шуданд.
Зимни суҳбати пурмуҳтаво ҳарду ҷониб ҳавасмандии устувори худро ба густариши бештари равобити дӯстӣ ва ҳамкории гуногунпаҳлӯ таъкид намуда, атрофи масъалаҳои марбут ба тақвияти заминаи ҳуқуқии равобити Тоҷикистону Словакия, аз ҷумла таҳия ва имзои созишномаҳои ҳамкорӣ дар соҳаҳои иқтисоду тиҷорат, сармоягузорӣ, илму маориф, кишоварзӣ, энергетика, фанноварӣ ва саӣёҳӣ мубодилаи афкор сурат гирифт.
Махсус таъкид карда шуд, ки ҳамасола дар доираи барномаи ҳукумати Словакия ба довталабони тоҷик бурсияҳо барои таҳсил дар риштаи магистратура аз рӯи соҳаҳои гуногуни иқтисодиёт ва ҳаёти иҷтимоӣ пешниҳод карда мешаванд.
Зикр гардид, ки соли 2008 дар шаҳри Братислава Ёддошти ҳусни тафоҳум миёни Вазорати рушди иқтисод ва савдои Тоҷикистон ва Вазорати иқтисодиёти Ҷумҳурии Словакия дар бораи ҳамкориҳои иқтисодӣ ба имзо расид.
Қобили зикр аст, ки аз рӯи натиҷаҳои соли гузашта ҳаҷми муомилоти молӣ байни Тоҷикистону Словакия ҳамагӣ 260,8 млн. доллар ва семоҳаи аввали соли равон 32 млн. долларро ташкил дод. Ҳамаи ҳаҷми муомилоти моли дуҷониба аз воридоти молу маҳсулоти Словакия ба Тоҷикистон иборат аст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
