Кумитаи рушди сайёҳии назди Ҳукумати Ҷумҳурии Тоҷикистон дар якҷоягӣ бо Бонки аврупоии таҷдид ва рушд (БАТР) ва маблағгузории Котиботи давлатии Швейтсария дар умури иқтисод, семинари омӯзишиеро барои соҳибмулкон ва роҳбарони осоишгоҳҳо, меҳмонхонаҳо, хостелҳо ва маҷмӯи хизматрасониҳои сарироҳӣ бо иштироки коршиносони байналмилалӣ дар мавзӯи: "Идоракунии меҳмонхонаҳо: таҷрибаи беҳтарин дар идоракунии меҳмонхона" баргузор намуд.
Чорабинии мазкур дар меҳмонхонаи Sheraton баргузор гардида, коршиносони сатҳи байналмилалӣ, ҳамоҳангсози БАТР Ролландс Репша ва мушовири байналмилалӣ бо таҷрибаи ғанӣ дар идоракунии меҳмонхонаҳо ва осоишгоҳҳо, директори собиқи меҳмонхонаи “Le Meridien Hotel golf” ва “Country Club Resort” дар шаҳри Маскав, директори генералии меҳмонхонаи «Қасри Невский»-и Санкт-Петербург, ва « Метехи Палас»-и Тбилиси Фердинанд Виеленд ба иштирокчиён нозукиҳои тиҷорати меҳмонхонаро омӯхтанд.
Дар рафти чорабинӣ 30 нафар соҳибмулкон ва роҳбарони меҳмонхонаҳои маҳаллӣ иштирок намуда, дар бораи тамоюли рушди ҷаҳонии бозори меҳмонхона ва ҷанбаҳои муҳими идоракунии он, ба монанди истифодаи самараноки захираҳо, идоракунӣ, фурўш, маркетинг, сифати хизматрасонӣ ва ғайра маълумоти муфид ба даст оварданд.
Тибқи гузориши Бонки Аврупоии Таҷдид ва Рушд «Муҳити бизнес дар Ҷумҳурии Тоҷикистон», сайёҳӣ яке аз соҳаҳои ояндадори иқтисодӣ ба шумор рафта, дар сурати рушд кардани он метавон буҷаи кишварро аз ҳисоби даромади соҳа ғанӣ гардонид. Помир ва водии Зарафшон ду самти асосии сайёҳии Тоҷикистон ба шумор рафта, кишвар дорои иқтидори бойи захираҳои ҷолиби сайёҳист, ки он барои фаъолияти ширкатҳои хусусӣ дар бахши меҳмондорӣ ҷиҳати қонеъ кардани талаботи сайёҳон дар асоси таҷрибаи пешқадами байналмилалӣ ва беҳтар намудани инфрасохтори соҳа хеле муҳим аст.
Баъд аз анҷоми омӯзиш коршиносони байналмилалӣ дар алоҳидагӣ бо соҳибмулкон ва роҳбарони меҳмонхонаҳо суҳбат ороста, ба саволҳои онҳо посух гуфтанд
Фардо коршиносони байналмилалӣ аз якчанд меҳмонхона ва осоишгоҳҳо бо мақсади кӯмак ба роҳбарияти онҳо ҷиҳати рушди тиҷорат сафар мекунанд.
Бонки Аврупоии Таҷдид ва Рушд шуруъ аз соли 1997 дар Тоҷикистон фаъолият менамояд ва дар ин муддат ба зиёда аз 600 корхонаҳои хурду миёна кӯмак намуда, дар ислоҳоти соҳаҳои ба монанди тандурустӣ, об ва идоракунии захираҳои табиӣ, баланд бардоштани дастрасӣ ба адолат, инчунин мусоидат ба гузаштани кишвар ба иқтисоди бозоргонӣ кӯмаки молиявӣ мерасонад.
